Ubanjiwe umama wemveku efunyenwe efrijini
Umama oneminyaka engamashumi amabini anesixhenxe (27) uselugcinweni lwamapolisa emva kokubhaqwa kosana lwakhe olusandul’ ukuzalwa kwisikhenkcezisi eOdendaalsrus, eFreystata.
Ngomhla we11 kweyoMsintsi 2024, amapolisa aseOdendaalsrus afumana isikhalazo kumhlali waseKutloanong owabhaqa usana olusandul’ ukuzalwa kwisikhenkcezisi kwityotyombe elikwiyadi yakhe.
Isithethi samapolisa uCaptain Stephen Thakeng uthe bakufika kwindawo yexhwayelo, amapolisa abhaqe umzimba wosana olusandul’ ukuzalwa ngaphakathi kwisikhenkcezisi esongelwe ngomntla wetracksuit efakwe kwingxowa yeplastiki. Umzimba wosana wawusele uqinile ungumkhenkce.
UThakeng uthi umama wayengekho kwindlu awayerenta kuyo ngethuba ebhaqwa usana.
“Abasebenzi bakaxakeka kwezonyango babizwe kwindawo yexhwayelo kwaye baqinisekisa ukuba usana lubhubhile. Ityala lokufihlwa kokuzalwa libhaliswe ukuze kuqhutyekwe nophando,” utshilo uThakeng.
Amapolisa aqalisa ukukhangela lo mama waza wazinikela kumapolisa aseOdendaalsrus ngosuku olulandelayo.
Lo mama wabanjwa kwaye bekulindeleke ukuba avele ngoMvulo we16 kweyoMsintsi 2024 kwiNkundla kaMantyi yaseOdendaalsrus.