Ufuna inguqu kwiEPWP uMacpherson
IExpanded Public Works Programme (EPWP) yenye yeenkqubo ekukudala zidala amathuba omsebenzi wexesha elincinci kulutsha lweli kwiinzame zesebe lemisebenzi yoluntu.
UMphathiswa omtsha weli sebe uDean Macpherson uthi unombono wokwenza inguqu kwindlela esebenza ngayo inkqubo ye-EPWP.
Le nkqubo yayingumbono womphathiswa weli sebe uNkosazana Stella Sigcau ngexesha lakhe phantsi kolawula lukaMongameli uNelson Mandela.
UMacpherson uthethe oku ngethuba esenza utyelelo kwisakhiwo esatshayo sepalamente yelizwe loMzantsi Afrika.
“Kumele ukuba inkqubo ye-EPWP yenziwe ngendlela ebuyisa isidima sabantu abatsha, yenziwe ngendlela eza kubaxhobisa ngezakhono abazidinga ngamandla ukuze balungele ikamva,” kutsho uMacpherson.
Lo Mphathiswa ebetyelele izakhiwo zepalamente ezikwinkqubo yokuvuselelwa lisebe lakhe.
“Inkqubo ye-EPWP yayenzelwe ukuba ibengumsebenzi wethutyana ukuze abantu balungele ukungena emisebenzini, kodwa ngenxa yentswelo ngqwesho,” uhambisa atsho uMacpherson.
UMacpherson nguMphathiswa olilungu lombutho weDemocratic Alliance ongene endaweni kaSihle Zikalala weANC.
“Njengoko benditshilo kwintetho yohlahlo lwabiwo mali yesebe lam kwiveki ephelileyo, iEPWP iza kwenziwa ukuba ixhobise ngezakhono, ivule amathuba engqesho anesidima baphangele abantu,” ucacisa atsho uMacpherson.
Lo Mphathiswa akayekanga ukusebenzisa eli thuba lotyelelo lakhe epalamente ukuvakalisa iinjongo zakhe ngesakhiwo sepalamente esatshayo.
“Ndizimisele ukubeka iliso umsebenzi oza kuqhubeka apha wokwakhiwa kwakho kwepalamente kazwelonke, le yenye yezindlu ezinembali yelizwe loMzantsi Afrika,” kutsho uMacpherson.
Eli sebe linikele ngalo msebenzi kwiSouth African Development Bank ukuba iqwalasele ukuvuselelwa kwakho kwesi sakhiwo. Abasebenzi be-EPWP baziwa ngokulala ecaleni kwendlela bebonisa ukudinga into yokwenza okanye ukonqena.