Iindaba

Bavele enkundleni nezilamane zabo abenze ubuqhophololo kwikholeji yeTVET

Cwayita Nondula|Published

UNokwenjenje Matiwane (61), Mninawe Notshikila (35), Akhona Nkosazana Mveke (35), Asandiswa Wendy Mbebe-Mxali (44), Siyabulela Government Mxali (46), Balungile Godfrey Makaula (36), Zukiswa Nqina-Makaula (37), Asiphe Nombanga kunye noNobantu Makaula (62) bavele kwiNkundla yoLwaphulo-mthetho lwezoRhwebo eMthatha izolo umhla wesine kweyeKhala ka-2023.

Oku kulandela ukubanjwa kwabatyholwa yiSerious Commercial Crime Investigation yeeHawks ezinze eMthatha kwiinzame ezihlangeneyo neSerious Corruption Investigation, iSerious Organised Crime Investigation, iYunithi yokuThinjwa kweAsethi (AFU) yeGunyabantu lezoTshutshiso (NPA) kunye neOR Tambo Public Oder Police (POP) ngezityholo zokusebenzisa imali ngokungekho mthethweni, ubuqhophololo nobusela ngomhla wesithathu kweyeKhala kulonyaka.

Ngokwengxelo ephuma kwisithethi sooKhetshe kweli phondo uKapteni Yolisa Mgolodela, kutyholwa ukuba phakathi konyaka ka-2016 no-2019 uAkhona Mveke noAsandiswa Mbebe-Mxali bebeqeshwe njengamaGosa aziiNtloko zezeMali eIngwe TVET College eMount Frere. UZukiswa Nqina-Makaula wayeqeshwe njengoNobhala weeNkonzo zeShishini, basebenza kunye kwaye kutyholwa ukuba benza iqhinga lokuqhatha eli ziko izigidi zeerandi.

Kuthiwa baye bajika kwaye baphinda iintlawulo ngokufaka iinkcukacha zebhanki zababoneleli-nkonzo abasemthethweni neenkcukacha zabo kunye nezezalamane zabo kunye nabantu abatshate nabo.

IiHawks ziye zalunyukiswa ngezi zenzo zingekho mthethweni kwaza kwenziwa uphando. Uphando luqinisekise ukuba le kholeji ilahlekelwe yimali engaphaya kwe-7.8 yezigidi zeerandi kungoko kubanjwe abarhanelwa abalithoba.

Abarhanelwa bavele okokuqala kwiNkundla yamaTyala ezoRhwebo eMthatha izolo ngomhla wesine kweyeKhala nalapho bakhululwe ngebheyile yamawaka asixhenxe eerandi (R7000) umntu emnye ngaphandle kukaNokwenjenje Matiwane iimeko zakhe zobuqu ziyezaqwalaselwa ngurhulumente.

Lo mba uhlehliselwe umhla wama-25 kweyeKhala ngo-2023 ukuze kuphandwe.

Iinzame zentsebenziswano yee-arhente zogcino-mthetho zinconywa yiNtloko yePhondo yeeHawks uMajor General Mboiki Obed Ngwenya ngokuvelisa iziphumo ezichulumancisayo.