Iincwadi zombhali uTlotlisang Mhlambiso
Image: Uthunyelwe
UTlotlisang Mhlambiso ngumbhali wolwimi lesiXhosa nangona ezalelwe kwintlalo yesizwe sabeSotho phantsi kwentaba zoKhahlamba eMount Fletcher.
Sele ekhuphe iincwadi ezine, ezintathu kuzo zibhalwe ngolwimi lwesiXhosa, logama enye yazo ibhalwe ngolwimi lesiNgesi. Ngaphandle kokuba engumbhali wolwimi lesiXhosa uTlotlisang Mhlambiso, ukwangumfundi wenqaba leMasters kwiYunivesithi yaseFreyistata.
"Incwadi yam yokuqala yincwadi yemibongo esihloko sayo sithi ‘Ukuphuma kwelanga’, imibongo yam inemixholo eyahlukeneyo, eminye ingentlalo ngelixa eminye ingeziganeko zobomi kwakunye namahlandinyuka eli limiweyo,” kucacisa uMhlambiso.
Nangona bekhona bebaninzi ababhali abatsha ngolwimi lwesiXhosa kodwa mncinane umdla wabantu bolu lwimi ukufunda izinto ezibhalwe ngolwimi lwabo.
"Incwadi yam yesibini yeyamabali amafutshane esiXhosa kunye nesiNgesi esihloko sayo sithi ‘A Journey Worth The Ride’, ukanti eyesithathu incwadi yeyemibongo esihloko sithi ‘Phinda ubhale’,’’utsho uMhlambiso.
Enye yeencwadi zakhe yileyo ithi ‘Zizinto zobomi’, yona igxile ngamandla kumbhodamo kunye nentlungu eyathi yehlela umzi waseAfrika ngonyaka ka-2020, kutsho uMhlambiso.
"Ndiqalise ukubhala kuba ndandifuna ukufezekisa iphupha lam lobuntwana, ndaqalisa ukubhala ngokuvuselelwa sisimo sentlalo yasezilalini,” ucacisa atsho uMhlambiso.
Uthi ukungafezeki kwamaphupha wabantwana abakhulele ezilalini okubangelwa ziimeko ezinzima zentlalo, yenye yezinto ebihlala isenza isithukuthezi kuye.
Iivenkile ezithengisa iincwadi eMzantsi Afrika aziqalisi ukuthengisa iincwadi zolwimi lwesiXhosa nezinye iilwimi zemveli kweli, oku kwenza ukuba kubenzima kubabhali beelwimi zeli ukuthengisa umsebenzi wabo.