UJonathan Butler uwongwe ngesidanga sobuGqirha yiYunivesithi yaseStellenbosch.
Image: IOL
IYunivesithi yaseStellenbosch eNtshona Koloni iwonge ngesidanga sobuGqirha enye yeemvumi eziphambili kweli nakwihlabathi kumculo weJazz uJonathan Butler.
UButler yinjinga engadingi kwaziswa kangako xa kuthethwa ngomculo weJazz kweli loMzantsi Afrika ngenxa yendima ayidlalileyo.
Lo kaButler yenye yeemvumi ezimbalwa kweli ekwazi ukucula ngomlomo logama ekwadlala ikatala ngokucokiseko olulodwa. Ngaphandle kokuba edlala ikatala, uButler uyakwazi ukudlala iikatala ezimbini kwingoma enye ngaxeshanye.
UButler yinzalelwane yaseAthlone eKapa nethe yazibalula kakhulu ngokudlala umculo weJazz ukusukela ngeminyaka yoo1980 namaqela ahlukeneyo kweliya leNtshona Koloni. Ngenxa yobunkunkqela bakhe bokudlala ikatala, uButler sele ewongwe ngeembasa ezininzi kakhulu kwihlabathi.
Xa umamela isimbo sakhe sokudlala ikatala sifana ncama neso sikaEl Klugh wodumo waseMelika. Ingoma yakhe ethi Seventh Avenue, Phathaphatha zezinye kwezimenzele indumasi ngexesha lakhe lokudlala umculo weJazz kweli nakumazwe ehlabathi.
Related Topics: