UMofokeng uquthise iSundowns yanikezela emdlalweni weNedbank Cup
Ziintshatsheli kwakhona i'Orlando Pirates. Oku kwenzeke emva kokuba iquthise iMamelodi Sundowns ngamagowuli amabini kwelinye emdlalweni weNedbank Cup obutaka iintlantsi eMbombela Stadium namhlanje emalanga. Kokwesibini iPirates iphakamisa indebe yeNedbank amatyeli elandelelana.
Ekuqaleni kwesizini ka2023/24, iPirates yaphakamisa indebe yeMTN8 emva kokubetha iSundowns emdlalweni owawubanjelwe eMoses Mabhida Stadium. Amaqela omabini aye kwixesha lokuphumla engenanto ebhodini nakubeni amathuba okufaka amagowuli ebekhona.
USipho Chaine wenze into enkulu kwisigaba sokuqala. Uvale ipenela ebifunyenwe yiSundowns. Kwisigaba sesibini somdlalo, iPirates ibhaqe eyayo nayo ipenela. UPatrick Maswanganyi uyibeke emnatheni yakhokela iPirates ngegowuli. Khange kudlule imizuzu emininzi, uThemba Zwane uphendule ngegowuli atsho abambana.
Ekuzeni kuphela komdlalo, uRelebohile Mofokeng ongene wafaka igowuli elinike iPirates impumelelo ebalulekileyo. UMofokeng liqhawe lePirates kwaye sokuze alityalwe ngabalandeli. Yona iSundowns ibibethwa okwesibini kule sizini.