Kusongwa itumente yokuqala yeBorder Rugby United ngomso. Iziqwayi zamaqela zamaqela kulindeleke zivale iBrutten Top 10 ngomdlalo wombhoxo ongasoze ulityalwe. Oku kuza kwenzeka xa kudibana iFort Hare Blues neSwallows emdlalweni wokugqibela eSisa Dukashe Stadium ngentsimbi yesine emalanga.
La maqela adlulele kwisigaba sokugqibela setumente emva kokudlula emaqeleni alushica eMdantsane. Emdlalweni wokuqala, iFort Hare ingombe iYoung Leopards ngo’15-6 igoloza. AmaHobohobo akabethwanga engazamanga.
Oyisakele ngoba adibene neBlues ngexesha elibi ilume ongezantsi. Yona iSwallows izibethele iWSU All Blacks emdlalweni ebekunzima ukubona ukuba leliphi eliza kuphumelela. Iinyoni zidlulele kwisigaba esilandelayo emva kokuphumelela ngo’11-6. Kuyo yomibini imidlalo akubangakho qela eligqame kakhulu ngoba imidlalo ibibambene futhi kubonakala ukuba amaqela alwela ukuphumelela iBrutten Top 10 exhaswa nguTekkie Town.
Phambi komdlaloo wokugqibela, iWSU All Blacks iza kugabula izigcawu neYoung Leopards emdlalweni ekunyanzelekileyo ukuba kubekho eliphumelelayo. Kufuneka kubekho iqela elikwindawo yesithathu neyesine ngokulandelelana xa kusongwa itumente. Ukuba ingaphumelela iFort Hare, ingayinto enkulu kakhulu kuyo ngoba inesicwangciso sokubuyela emidlalweni yamaziko emfundo ephakamileyo kunyaka ozayo.
Imidlalo efana nale yeBrutten Top 10 iza kubuyisa ukuzithemba ebadlalini. Kanti kwelayo icala iSwallows ingayivuyela indebe ngoba lo nto iza kuphakamisa isidima sayo njengeqela eliphambili embhoxweni waseMpuma Koloni.
Iqela eliphumeleleyo liza kufumana indebe yesiliva nemali engamashumi amathathu amawaka erandi (R30.000). Lona eloyisakele emdlalweni wokugqibela liza kufumana amashumi amabini amawaka erandi (R20.000). Amanye aza kufumana ishumi lamawaka (R10.000) namawaka amahlanu erandi (R5.000) ngokulandelelana.
UNabi ufuna abadlali abavutshiweyo, hayi imiqheliswa kwiChiefs!