Akundichaphazeli ukuhamba kukaBadela' - utsho uErnst Middendorp

Emva kokugxothwa kwabaqeqeshi ababini kwithutyana elifutshane, uErnst Middendorp uthi akanawo umdla wokuba ngumqeqeshi weDurban City. Ukuthethe oku uMiddendorp emva kwencoko yabalandeli abamkrokrela ngokungqiniba abaqeqeshi abasebenze phantsi kwiqela laKwaZulu-Natal angumlawulo oyintloko kulo.

Ekuqaleni kwale veki, iDurban City ikhombe emnyango uSinethemba Badela obenemidlalo emithathu kuphela. UBadela uqale ukuqeqesha kulo nyaka emva kokugxothwa kukaGavin Hunt obeqale isizini. Naye wakhonjwa emnyango nangona iDurban City ibisaqhothoza kakuhle kwicala lokuqokelela amanqaku.

Akukho sizathu esixeliweyo esibangele akhululwe uBadela owambe emva kokuba iDurban City ibethe iChippa United kwiipenela yatsho yadlulela phambili kwiNedbank Cup. UMiddendorp, 67, uyibeke yacaca into ethi yena akanawo umdla wokuqeqesha iDurban City kwingxelo ayibhale kuLinkedIn.

"Ndandingekho ngethuba kuhamba uGavin Hunt ngoba ndemka phambi kwakhe," utshilo uMiddendorp oqeqeshi amaqela aquka iKaizer Chiefs neMaritzburg United. "Mna ndifike ndangena kwisikhundla somlawuli kwinyanga yoMnga kunyaka ka2025. Kwakhona ndifuna ukucace ukuba andinawo umdla wokuba ngumqeqeshi weDurban City.

Khange kubekho nento ethi ndingalandela uSinethemba Badela. Bendimxhasa umqeqeshi njengomlawuli weqela," utshilo uMiddendorp ongowaseJamani ngokuzalwa. Akhona amahumhum athi uJohn Maduka angathatha iintambo kwiDurban City emva kokunqunyanyiswa yiMagesi FC emqumamisileyo ngenxa yeziphumo ezibi.