Kuvuyiswana noHlumelo Gingxana oyintshatsheli entsha yeMpuma Koloni

Imbethimaqindi esaze ngobuso ezweni igoduke incumile emva kokuzuza impumelelo ebiyizingela. Oku kwenzeke emva kokuba uHlumelo Gingxana ewise phantsi ngenqindi uAphiwe Magobiyane obefuna intshinga emlweni obuphambili kwitumente yamanqindi ebibnjelwe eThobi Kula Indoor Sports Centre, eKomani, ngempelaveki egqithileyo.

UGingxana waseBraelyn yintshatsheli entsha eMpuma Koloni (Lightweight) emva kokuba ewuphelise kumjikelo wesibini umlo ophambili obuza kutsala imijikelo elishumi. Le tumente ekuthathe inxaxheba kuyo iimbethimanqindi ezisakhulayo ibiququzelelwe yiPepzin Boxing Promotions ibambisene nesebe leZemidlalo, uBugcisa neNkcubeko kwiphondo leMpuma Koloni.

Komnye umlo obujongwe ngamehlo abomvu ngabalandeli babamanqindi, uAmzolelo Dyeyi waseMdantsane ubethele uMawethu Limo waseNcerha zacima pam izibane kumjikelo wesithathu emlweni weBantamweight. Emlweni ezinqoze ngamandla kuwo, uMpumelelo Nyalela waseCale woyise ngamanqaku uHlumelo Makhonco waseDuncan Village emlweni weBantamweight.

Komnye umlo weembethimanqindi ezisafufuzayo obunemijelo emithandathu, uChumani Ngqeleni waseLinge uzuze impumelelo emva kokuba ebethe uSibusiso Moyakhe waseGqeberha.

Indodana yaseNdwe, uSinoxolo Zonke, ibethe uSikhokele Nyamakazi waseKomani kwaphela ngaye kumjikelo wesithathu emlweni weLightweight obunemijikelo emine. Yena uAbenathi Magoqoza waseMdantsane ugqagqanisele uLikho Mshwemshwe waseLinge wamlahla phantsi kumjikelo wokuqala kwiJunior Flyweight.

Umbutho olawula amanqindi, iBoxing South Afrika uyiqhwabele izandla intshatsheli entsha yephondo. "Siyavuyisana nentshatsheli entsha, uHlumelo Gingxana, emva kokuzuza impumelelo encomekayo.

"Kwangaxeshanye, sibulela ebantwini baseKomani abenze kwamnandi ngexesha bekuqhubeka itumente. Yinkqubo yophuhliso le eyenzelwe ukugqamisa iintshatsheli zehlabathi zangomso," itshilo ingxelo ekhutshwe nguBoxing South Africa emva kwetumente eqhubeke ngaphandle kwamagingxigingxi eKomani.