UCedric Kaze ucacisa okubethise iChiefs emdlalweni weNedbank Cup

Amakhosi azikhotha amanxeba emva kokuphuma kumjikelo wokuqala weNedbank Cup. Oku kwenzeke emva kokuba ebethwe yiStellenbosch FC ngamagowuli amabini welinye emdlalweni obutaka iintlantsi eCape Town Stadium izolo ebusuku.

UCedric Kaze ubalule isiqalo esibi seKaizer Chiefs nokungakwazi kwayo ukusebenzisa intaphane yamathuba avelileyo. Iingxaki zeChiefs ziqale kwangoko emdlalweni ngethuba uFlavio Da Silva ekhaba umdlali weStellenbosch ebhokisini. Ifumene igowuli ngepenela emva koko uTitus wafaka elesibini.

Nangona kunjalo, iChiefs ilwile yafumana amathuba Amahle angasetyenziswanga nguMduduzi Shabalala. Kuyiwe kwixesha lokuphumla iStellies ihamba phambili. Ibiphantsi koxinizelelo iChiefs kwisigaba sesibini ngoba ibiziintshatsheli ezikhuselayo.

Ikwazile ukufumana igowuli lokubika elifakwe nguDa Silva ngepenela. "Ndicinga ukuba sibulaleke kwimizuzu yokuqala emdlalweni. Iingqondo zethu bezingekho semdlalweni ngokupheleleyo," utshilo uKaze emva kokuba iChiefs iphoswe yindebe ebibeke ithemba kuyo.

"Sivumile kwafakwa amagowuli emizuzwini engamashumi amabini kwisigaba sokuqala. Besinawo nathi amathuba amabini okanye amathathu esingawasebenzisanga. Ndifuna ukuthi le yenye yeemini esenze yonke into emdlalweni - kodwa asabhaqa nto.

"Sidale amathuba amaninzi futhi zikhona neebhola ezibethe epalini. Kufuneka siyibeke ngemva eyenzekileyo ngoba sijongene nomdlalo onzima ngeCawa," utshilo uKaze ethetha kwiSuperSport TV. Amakhosi aza kudibana neAl Masry emdlalweni weCAF Confederation Cup.