UKwayiba ungcwabe iDurban City emdlalweni obuseBuffalo City Stadium namhlanje
iChippa United ibethe iDurban City emdlalweni weBetway Premiership obubanjelwe eBuffalo City Stadium namhlanje emalanga.
Image: Pedro Mapelo/I'solezwe lesiXhosa
Zithe xibilili izibilini kubalandeli beChippa United okomzuzwana emva kokuqhuba kakuhle kwayo. Oku kulandela ukubetha kwayo iDurban City ngamagowuli amabini eqandeni emdlalweni weBetway Premiership obubanjelwe eBuffalo City Stadium. Ngoku iChippa inyukele kwindawo yeshumi elinesine.
USinoxolo Kwayiba, obekhe wenza utsi-gxada kwi'Orlando Pirates ekuqaleni kwesizini, uyingcwabe eyedwa iDurban City ngamagowuli amabini ebaleni eliseMonti ebeligcwele abalandeli beChippa United njengesiqhelo. Omnye umdlali odlale kakuhle nguGoodman Mosele esiswini.
Kuyiwe kwixesha lokuphumla iChippa United ihamba phambili ngegowuli elinye eqandeni. Igowuli lithe gqi ngoSinoxolo Kwayiba odlalelwe ibhola esendaweni entle. Umdlalo uqale ngesantya esiphantsi ngenxa yobushushu eMonti.
Noxa amaqela eqale afundana kungekho elifuna ukulahlekelwa emdlalweni - kodwa wona aye aswabuluka ahlaselana. Iqela elidlalela ekhaya lilo eliqale lankqonkqoza - kodwa lafika ethe qwa uDarren Keet ezipalini zakhe. Nangona ibiqinile emva iDurban City, abadlali beChippa khange bayeke ukuzama ukufumana igowuli.
Emva kokufumana igowuli, iChippa United iquqe ibuyelela okwezulu laseMthatha - kodwa kube nzima ukugqobhoza ngenxa kaDarren Keet ovale iibhola eziyingozi ezize kuye macala omabini. Amaqela abuyele ebaleni enamandla emva kwexesha lokuphumla.
Bekunyanzelekile ukuba iChippa izame igowuli lesibini lesiqinisekiso. Ngethamsa, iye yenzeka lo nto ngethuba uKwayiba ebhakuzelisa umnatha kwakhona emva kwempazamo eyenziwe ngabadlali beDurban City abaphise ngebhola endaweni embi. Kude kwaphela ixesha iDurban City ingakwazanga nokufumana igowuli lokubika.