Umlawuli weChippa ohambileyo uqinisekile ngokusinda kwayo ezembeni
USinesipho Mali uyishiyile iChippa United emva kweenyanga ezintandathu engumlawuli wayo.
Image: Facebook
USinesipho Mali uzichithile iintente eGqeberha emva kokushiya kwakhe iChippa United. Isibhengezo senziwe nguMali buqu kumakhasi onxibelelwano ebutsheni bale veki.
Uyinikele umva iChippa United emva kweenyanga ezintandathu waqeshwa njengomlawuli ekuqaleni kwesizini eqhubekayo kunyaka ophelileyo.
Wabuyiselwa ephondweni nguMnu. Siviwe Mpengesi owayezama ukuphucula indlela esebenza ngayo iChippa United emva kokuphosa yiTop 8 phantsi kukaThabo September owakhetha ukuhamba endaweni yokuthotyiselwa.
UMali ebengumlawuli kwiChippa United obenegunya lokulawula konke okwenzeka eqeleni. Ngelishwa izinto zange zihambe kakuhle isizini isaqala. Wakhonjwa emnyango uSinethemba Badela emva kwemidlalo emibini.
Umncedisi wakhe uMusa Nyatama wabamba umdlalo wamnye wakhululwa phambi kokufika kukaLuc Eymael ongakhange akwazi ukuyinceda iChippa esemsileni ngoku. Akucaci kakuhle nokuba ukuhamba kukaMali koyamene neziphumo ezibi eziveliswa liqela okanye ugqibe kwelokuba ashenxe engagxothwanga.
UMali waseNgxwalane, eQonce, ebesuka kwiSekhukhune United phambi kokubamba isikhundla esiphezulu kwiqela laseMpuma Koloni. Waziwa kakhulu ngokuba ngumhlalutyi okwayintlola yetalente ebholeni ekhatywayo.
Ushiya iChippa esaziwa ngoba ukhe wasebenza kwiKaizer Chiefs – kanti ukhona kumaqela esizwe aquka aBanyana Banyana naBafana Bafana asuka nabo kwiAfrica Cup of Nations ebanjelwe eMorocco. Nangona ehambile – kodwa uMali umbulele uMpengesi ngokumnika ithuba lokusebenzela iqela lakhe.
"Emva kweenyanga ezintandathu, ndifuna ukwazisa abantu ukuba ndimkile kwiChippa United. Ndibulela usapho lakwaMpengesi ngokundithemba kwiqela endaqala kulo ukusebenza ebholeni ekhatywayo kwinqanaba eliphezulu," utshilo uMali.
"Ndibulela abasebenzi, abadlali nabalandeli abandinike inkxaso. Ndakuhlala ndilixhasa iqela ngoba libalulekile ephondweni. Ndiyinqwenelela okuhle iChippa United futhi ndiqinisekile ukuba iza kuliphepha izembe ekupheleni kwesizini," utshilo uMali ekuthiwa angasebenzela AmaZulu kulo nyaka mtsha.