UBobby Motaung akayingeni ekaRulani Mokwena okwangoku!
UManager Bobby Motaung ucacisa okubangela iKaizer Chiefs ingaqeshi umqeqeshi omtsha isizini iphakathi.
Image: AFP
Umphathi weKaizer Chiefs, uBobby Motaung, uxelele Isolezwe laKwaZulu-Natal ukuba abazimiselanga ukwenza iinguqu isizini iphakathi. Oku ukuthethe nangona kuvakala amahumhum ayamanisa uRulani Mokwena nokuqeqesha iChiefs kule sizini.
Amakhosi aphethwe ngabaqeqeshi ababini, uCedric Kaze noKhalil Ben Youssef, abanikwa uxanduva emva kokuhamba kukaNasreddine Nabi ekuqaleni kwale sizini eqhubekayo. Ingxoxo ngomqeqeshi omtsha iphenjelelwa kukuba dikidiki kweziphumo ezivekiswa yiChiefs.
Amakhosi sele ephoswe yiCarling Knockout Cup kanti akakwazanga ukuqala ngendlela encumisayo kwiCAF Confederation Cup ekulindeleke aqhubele phambili nemidlalo yayo ekuthambekeni kwale nyanga.
Oku kwenzeke kukho ithemba kubalandeli emva kokuba Amakhosi egwebe indlala yeminyaka elishumi ngokuphumelela indebe yeNedbank kwisizini egqithileyo. Nangona kukho ukuxhalaba kwicala labalandeli, bona abaphathi beqela bafuna uKaze noBen Youssef baqhubele phambili nomsebenzi kude kuphele isizini.
UMotaung ucacisile ukuba kutheni iChiefs ingafuni ukwenza iinguqu. "Asifuni ukuphazamisa indlela elisebenza ngayo iqela ngoku ngokuzisa umqeqeshi omtsha oza kufuna ukuzisa izinto ezintsha," utshilo uBobby Motaung kwiintsuku ezidlulileyo.
"Abaqeqeshi baneendlela abafuna zenziwe ngayo izinto futhi bafuna ukuncedisa ngabantu babo. Amadoda esinawo ngoku aqale nathi isizini futhi nathi sakha iqela phezu komsebenzi wawo. Sifuna ukuya phambili ngoba ndicinga ukuba indlela eliqhuba ngayo iqela iyaphucuka," utshilo uMotaung.
Kwelinye icala, uMotaung uthe akukho sicwangciso sakongeza abadlali kulo nyaka umtsha nangona kukho into ethi iChiefs igacele umdlali weTS Galaxy. "Angeke sihlale xa kukho umdlali okhethekileyo othengiswayo.
"Lo nto singayiqwalasela. Indlela iqela elidlale ngayo isasonwabisa. Bekukho abadlali abonzakeleyo abaphilileyo ngoku. Kufike abadlali abaninzi ekuqaleni kwesizini abanye babo abangekadlali. Badinga ithuba abadlali ngoba kunzima ukudlalela iChiefs. ," utshilo uMotaung. Amakhosi aza kudibana neGolden Arrows kwiveki ezayo.