AmaZulu athathele kuwo uLentjies noMngomeni enyakeni omtsha!
AmaZulu achonge abaqeqeshi abatsha abaza kuncedisa iqela elidlala kwiDiski Challenge.
Image: AmaZulu
Phambi kokuqala kwesiqingatha sesibini sesizini, AmaZulu enze iinguqu ezibonakalayo ngokuqesha amagqala aziwayo ebholeni ekhatywayo. Oku kulandela emva kokuba enike uKurt Lentjies uxanduva lokuqeqesha iqela elidlala kwiDStv Diski Challenge.
Uza kuncediswa yindodwa eyaziwayo, uThabo Mngomeni, owayengumdlali oqaqambileyo ngeentsuku zakhe zobutsha. La madoda mabini aza kuncediswa nguThami Gwala, oqeqesha oonozinti, noDiana Masaire ongumhlalutyi wabadlali beqela labadlali abasakhulaayo.
ULentjies noMngomeni bafumana ikhaya elitsha emva kokugxothwa yiFC Ravens edlala kwiABC Motsepe League kwiphondo leMpuma Koloni. Emva kokubeka phantsi ebholeni ekhatywayo kwiminyaka embalwa edlulileyo, uLentjies sele eqeqeshe amaqela aliqela.
ULentjies unethuba elide ngoku esebenza ngokubambisana noMngomeni owadlalela uMthatha Bush Bucks iminyaka eliqela phambi kokwenza ezibukwayo kwi'Orlando Pirates eyamphakamisa wabonwa kwiqela lesizwe loMzantsi Afrika lebhola ekhatywayo.
"AmaZulu DDC aqala unyaka ngokwenza iinguqu kwicala labaqeqeshi abakhokelwa nguKurt Lentjies noThabo Mngomeni. Abaqeqeshi baza kusekelwa nguThami Gwala noDiana Masaire," itshilo ingxelo ebhaliweyo ekhutshwe liqela.
Emva kwemidlalo elishumi elinambini, AmaZulu ahleli kwindawo yesixhenxe kwiDiski Challenge. AmaZulu abuyise uAyanda Mkhize ukuze aqinise inkqubo yokukhangela abadlali abanetalente abanokudlalela iqela njengokuba lizimisele ukuvelisa abadlali abasemgangathweni ophezulu.