Kuvalwa unyaka ngomdliva wamanqindi eOrient Theatre
iXaba Boxing Promotions iza kubamba itumente yamanqindi ngoLwesihlanu.
Image: Pedro Mapelo
Abalandeli bomdlalo wamanqindi baza kuvala unyaka ka2025 ngomdliva wamanqindi. Oku kuza kwenzeka xa kudibana oomanqanqa beembethimanqindi emilweni yetumente eququzelelwa yinkampani yabathelekisi eyaziwayo, iXaba Boxing Promotions, ngoLwesihlanu wale veki eMonti.
Umlo ophambili uphakathi kwentshatsheli enguSiseko Teyisi oza kudibana naye uAthenkosi Thongwana ozama ukoxutha intshinga yeSA Jr flyweight. Nakanjani, kuza kuphela usuku kukho intshatsheli entsha ngomso eMzantsi Afrika. Yena uAsandda Gingqi uza kudibana neLubabalo Kweyi emlweni weSA Jr Lightweight.
UMoyisi Booi, oyintshatsheli yeSA Jr Bantamweight, uza kukhusela intshinga yakhe xa edibana noLwando Mgabi. Ngomnye umlo ekulindeleke ujongwe ngamehlo abomvu ngabalandeli bamanqindi. Komnye umlo, uAvuma Ngcongolo udibana noYomelela Sisulu emlweni weBantam weight.
uAphelele uza kunxithana noKerebatswe Mamphoka waseGauteng emlweni onemijikelo emithandathu. USinalo Jonas uza kudibana noAphiwe Nxazonke emlweni onemijikelo emine. Ekupheleni kwetumente, zine iimbethimanqindi eziza kube zizintshatsheli. Intshatsheli nganye iza kufumana igusha.