Akasekho emhlabeni uLusanda Dumke obengumdlali weSpringbok Women!

Angena ngokungena amazwi ovelwano emva kokusweleka kukaLusanda Dumke obengumdlali weSpringbok Women. Ezi ndaba ezimbi zivakele ngale ntsasa emva kokunikezela kwakhe ngentseni yanamhlanje.

UDumke usweleke eneminyaka engamashumi amabini anesibhozo kuphela emva kokukhathazwa yimpilo emnyanzeleyo ukuba athi gu bucala embhoxweni. Kangangokuba bekukubi, uLusanda khange akwazi ukuba yinxalenye yeSpringbok Women kwitumente yehlabathi ebibanjelwe eYurophu kwiinyanga ezigqithileyo.

UDumke, obedlalela iiBulls Daisies, uye wabeka phantsi embhoxweni kwinyanga yeThupha kulo nyaka ngenxa yokwaphuka kwempilo yakhe. Lo mdlali waseMonti ngokuzalwa uza kukhunjulwa njengomnye wabadlali abaqaqambe ngenxa yetalente abancede ilizwe.

Udlula emhlabeni emva kokudlalela iqela lesizwe lombhoxo imidlalo engamashumi amathathu anesithathu. Kanti wenze indima ebonakalayo kwiqela eliphumelela iindebe zeWomen's Premier Division amatyeli amathathu ngethuba esengumdlali walo.

Ukubeka kwakhe phantsi kwaxhaswa ngokupheleleyo nguSwys de Bruin ongumqeqeshi weqela lesizwe lombhoxo wamantombazana. "ULusanda ebengumdlali weqela lesizwe obalulekileyo - kodwa simnqwenelela okuhle njengokuba ethatha ithuba lokujongana nempilo yakhe," watsho uDe Bruin kwingxelo ebhaliweyo eyakhutshwa kwiinyanga ezadlulayo.

Indlela ebedlala ngayo ebaleni ibincumisa kakhulu ngoba ebenamandla, enesantya futhi enengqondo yokudlala okwabangela aphumelele iwonga lomdlali wonyaka. UMongameli weSA Rugby, uMark Alexander, umchaze uLusanda njengomdlali obeyinkokeli enesibindi.

"Sakuhlala simkhumbula njengomdlali obekhaliphile kakhulu. Ebedlala ngokukhulu ukuzinikela ngamaxesha onke xa esebaleni. Ngamaxesha anzima, ukwazile ukunganikezeli. Egameni leSA Rugby, sithi masidlulile amazwi ovelwano kwikhaya lakhe. Ukulahlekelwa ngumntu osemncinane ngenxa yomhlaza yinto ebuhlungu kakhulu kuthi," utshilo uAlexander ethetha ngoLusanda owaqala ukudlala umbhoxo kwiBorder Ladies ngo2015.