Umbutho kaHolomisa umangalele uHugo Broos kwiKomishini yaMalungelo oluNtu
UHugo Broos ngumqeqeshi weqela lesizwe lebhola ekhatywayo.
Image: File
Umbutho wezopolitiko, iUnited Democratic Movement, umangalele uHugo Broos kwiKomishini yaMalungelo oluNtu atyholwe kuyo ngobuhlanga nokucwasa. Oku kulandela emva kwamazwi womqeqeshi waBafana Bafana awabhekise kuMbekezeli Mbokazi nomphathi wakhe ekuqaleni kwale veki.
UBroos uvakalise ukungonwabi kwakhe ngoLwesibini odlulileyo emva kokuba uMbokazi efike emva kwexesha ebelibekiwe. Ingxelo ithi umqeqeshi wePirates uthumene umyalezo othi uMbokazi ushiywe yinqwelontaka esuka kowabo eya eGauteng.
UBroos khange afune nokuva watsho esithi uMbokazi ucinga ukuba ungumdlali omkhulu. "Xa ubizwe kwiqela lesizwe eliza kudlala iAfcon neWorld Cup, umqeqeshi weqela lakho akunike iintsuku zokuphumla - xa uziphethe kakuhle, awuzihoyi.
NgoMvulo ulapha enkampini nabanye abadlali. Ndiza kuthetha naye uMbokazi emva kokuzilolonga. Ndifuna ukuniqinisekisa ukuba njengokuba engumntu omnyama, uza kuphuma entlanganisweni emhlophe," utshilo uBroos ethetha ngoMbokazi ofike ngoLwesibini enkampini.
Emva koko uchaphazele nento yokuhamba kwakhe uMbokazi othengwe yiChicago Fire yaseMelika. Uyichasile uBroos into yokudlala kukaMbokazi watsho etyhola umphathi wakhe ngokulukuhlwa yimali endaweni yokumkhangelela iqela elimfaneleyo.
"La mfazi ucinga ukuba uyayazi ibhola ekhatywayo," utshilo uBroos, kwatsho kwatsarhwa iinkokeli ze-UDM ezithe indlela athethe ngayo ayamkelekanga. ABafana Bafana balungiselela ukudibana neGhana emdlalweni wokucweya oza kube useDobsonville Stadium kwiveki ezayo.