UHugo Broos uyigalele amanzi yabanda ceke ekaMbokazi oza kudlala eMelika

Njengokuba uMbekezeli Mbokazi elungiselela ukuntingela eMelika ekuqaleni konyaka ozayo - umqeqeshi waBafana Bafana, uHugo Broos, uyigalele amanzi yaphola into yokudlalela iqela elwiMajor Soccer League.

UBroos uvakalise izimvo zakhe emva kokubuzwa ziintatheli enkampini yeqela lesizwe ePitoli. Kwiveki ephelileyo, i'Orlando Pirates iqinisekisile ukuba uMbokazi uza kudlalela iChicago Fire edlala kwiMajor Soccer League. Imali athengwe ngayo uMbokazi iqikelelwa kumashumi amahlanu ezigidi zeerandi (R50-million).

Indlela athethe ngayo uBroos ayothusanga ngoba waziwa ngokungabathandi abadlali baseMzantsi Afrika bayokudlala eMelika. UBroos uthe aqondi ukuba abaphathi bomdlali bathathe isigqibo esimlungeleyo uMbokazi.

Lo mdlali waseHluhluwe kwiphondo laKwaZulu-Natal utsale umdla wamaqela wamanye amazwe emva kokuzibonakalisa kwiPirates nakuBafana Bafana. "UMbokazi uya endaweni engamlungelanga. Uza kwenzani eChicago?" utshilo umqeqeshi emva kokumgxolisela ukufika kwakhe emva kwexesha enkampini.

"Ayililo neqela ekuthiwa liphumelela iindebe eli aza kulidlalela. Kuthiwa iChicago izakumdlalisa kumgangatho osezantsi. Andiyazi, kutshiwo - kodwa ndiza kumbuza xa ndidibana naye. Ndiyayazi into eyenzekileyo. Inenekazi elingumphathi kaMbokazi licinga ukuba liyayazi ibhola. Phofu lenza into eyenziwa nangabanye abaphathi babadlali.

"Ukuba ebekrelekrele, ngemyekile ngoba kukho iAFCON neWorld Cup ezizayo. Akhona amaqela abhetele abenokuya kuwo uMbokazi endaweni yokuya eChicago. Ufunani edolophini enkulu kanjeya? Abakhethanga kakuhle," utshilo uBroos ethetha neentatheli.

ABafana Bafana babila besoma ePitoli - apho balungiselela khona imidlalo yeAfrica Cup of Nations eqala kwiiveki ezizayo eMorocco. Kwiveki ezayo ngoLwesibini, aBafana Bafana baza kudlala umdlalo wokucweya neGhana phambi kokuya eMorocco. UMzantsi Afrika uza kudibana namazwe afana neZimbabwe, Egypt neAngola.