USipho Chaine ubalisa indlela abaza kumkhumbula ngayo uMbokazi omkileyo kwiPirates
USipho Chaine ethetha neentatheli phambi komdlalo weCarling Knockout Cup yalo nyaka.
Image: Backpagepix
Omnye wabadlali abaphambili kwi'Orlando Pirates, uSipho Chaine, uxele indlela abaza kumkhumbula ngayo uMbekezeli Mbokazi oza kudlala eMelika. UChaine ukwenze oku emva kokuba iPirates ibethe iMarumo Gallants ngegowuli elinye eqandeni yatsho yaphakamisa indebe yeCarling Knockout Cup.
Le yindlela ephucukileyo emkhaphe ngayo uMbokazi obelixhadi lePirates ngoba ukusukela kunyaka ozayo, uMbokazi uza kudlalela iChicago Fire emthenge ngemali eqikelelwa kwizigidi ezingaphezulu kwamashumi amahlanu eerandi (R50-million).
Njengomnye wooKapteni beqela, uMbokazi unikwe iwonga lokuphakamisa indeed yeCarling emva komdlalo obubanjelwe ePeter Mokaba Stadium ebigcwele amawakawaka abalandeli bebhola abonwabele umdlalo obumhle.
Igowuli ephumelele ngalo iPirates lifakwe nguRelebohile Mofokeng kwixesha elongezwe ngusompempe emva kokuphela kwexesha lomdlalo kungekho qela elibhalisileyo ebhodini. UChaine uchaze umfana waseHluhluwe, KwaZulu-Natal, njengomntu obedlamkile phakathi kwabanye abantu.
"Siza kukhumbula ubushushu bakhe nendlela ebethanda ngayo ukuqhula enkampini," utshilo uChaine obengomnye wabadlali abaziintsika zePirates eminyakeni embalwa edlulileyo. "Ebengumdlali obalulekileyo eqeleni ngoba ebengengomntu ozenza umntu angenguye.
"Yeyona nto esiza kuyikhumbula kakhulu ngaye," utshilo uChaine emva komdlalo obuseLimpopo. UMbokazi usenkampini yaBafana Bafana ebanjelwe eGoli - apho balungiselela iAfrica Cup of Nations yalo nyaka eza kuqala kungekudala eMorocco.