IPirates intywilisele iChippa United emdlalweni weBetway Premiership
i'Orlando Pirates ibethe iChippa United emdlalweni weBetway Premiership.
Image: OP/Facebook
Kunwatyiwe ngabalandeli be'Orlando Pirates emva kokuba ibethe iChippa United ngamagowuli amabini eqandeni emdlalweni weBetway Premiership obuse'Orlando Stadium namhlanje ebusuku. Amanqaku amathathu andise awePirates yatsho yalingana naweMamelodi Sundowns ehleli phezulu kwindawo yokuqala.
Emdlalweni obumhle eSoweto, amagowuli amabini afakwe nguEvidence Makgopa noAswin Appollis emva kokungena kwakho kwisigaba sesibini somdlalo. Akubangakho qela elikwazileyo ukubhalisa ebhodini kwisigaba sokuqala.
Oku kulandele emva kokuba amaqela engakwazanga ukusebenzisa imbinana yamathuba avelileyo emdlalweni. Njengesiqhelo xa idlalela kowayo, iPirates iwulawule umdlalo isebenzi uDeon Hotto noTshepang Moreni emaphikweni.
UMasindi Nemtajela noSipho Mbule bebeyinkathazo esiswini naxa ihlasela iPirates - kodwa uYanela Mbuthuma ebesoloko efumana ibhola exiniwe ngabadlali beChippa United ebifake uDumisani Msibi ezipalini.
Noxa iPirates ibihlasela - kodwa isokolisiwe yiChippa United ebizimisele. UMariko Abdoulaye noJustice Figareido benze umsebenzi oncomekayo bencediswa nguMsibi obambe iibhola ezimbalwa ebezikhatywe nguMbule noNemtajela.
Izamile iChippa ukuhlasela isebenzi uEva Nga Bienvenu oswantsulise uNkosinathi Sibisi noLebone Seema kakubi emva. Ukuxhathisa kwayo iChippa, ehlasele kakhulu ngoAzola Matrose, kuyincedile ngoba ikwazile ukudlala ngokuzithemba ngokuhamba komdlalo obubanjelwe eSoweto.
Abuyele kwisigaba sesibini omabini efuna indlela engaphumelela ngayo umdlalo. Khange kwenzeke nto yahlukileyo wade wenza iinguqu umqeqeshi wePirates ofake uEvidence Makgopa, Oswin Appollis noMakhaula Makhehleni.
Emzuzwini wamashumi asixhenxe anesihlanu, uMakgopa ubhakuzelise umnatha ngebhola ayinekelwe ngobuchule nguHotto. Wongeze elesibini uAppollis ngebhola ayinekelwe kakuhle nguDlamini. Ukubethwa kweChippa kongeze iingxaki zayo ngoba isahleli emsileni.