Amabhokobhoko aza kudibana neWales ecutheke amandla

Emva kokuphumelela imidlalo emine, Amabhokobhoko aya emdlalweni wokugqibela amandla wawo ehlile ngenxa yabadlali abahambileyo. Amabhokobhoko alungiselela ukudibana neWales emdlalweni wovavanyo wokugqibela kulo nyaka oza kube ubanjelwe eCardiff.

Iintsika zoMzantsi Afrika eziquka uPieter-Steph du Toit, uKwagga Smith, uJasper Wiese, uMalcolm Marx, uDamian de Allende, uJesse Kriel, uFranco Mostert, uCheslin Kolbe noManie Libbok babizwe ngamaqela abawadlalelayo phambi kokuqala kwesizini yeJapan Rugby League.

Ukuhamba kweziqwayi zabadlali kushiya amandla ephungulekile - kodwa nangani kunjalo, uDaan Human uqinisekile ukuba abadlali abakhoyo baza kuwenza kakuhle umsebenzi. UHuman uthe akalindelanga ukuba kubekho ingxaki ngoba bebehleli beliguqula iqela ukusukela ekuqaleni kotyelelo.

"Iveki neveki, besidlalisa abadlali abatsha. Ewe, bakhona abadlali abangekhoyo - kodwa akonakalanga nto ngoba abanye abadlali baza kutsho bafumane ithuba lokudlala," utshilo uHuman osebenza njengomqeqeshi weefolosi kwiSpringboks.

Njengokuba uMzantsi Afrika ungazange ubethwe kutyelelo oluseYurophu kunyaka ophelileyo, nakulo unyaka ungangabethwa ngoba uyiphumelele yonke oyidlalileyo. "Sazixelela unyaka usaqala esifuna kwenzeke. Mnye ngoku umdlalo esijongene nawo.

"Kungakuhle kuthi ukuba singayiphumelela yonke imidlalo yethu. Kodwa asicingi kokwenza irekhodi okanye ukungabethwa, ingqondo zethu zisemdlalweni. IWales ayiqhubanga kakuhle emidlalweni yale sizini - kodwa uHuman uthi abazikhathazi ngaleyo into.

"Siza kudibana neWales enabadlali abasemgangathweni ophezulu. UKapteni weWales ngumdlali onamandla futhi ongqongwe ngabanye abadlali abanamava. Asiyi kwiWales sicinga ukuba kufanele siphumelele. Kubalulekile ukulihlonipha iqela oza kudlala nalo.

"Iingqondo zethu zisemalungiselelweni omdlalo ngokupheleleyo," utshilo uHuman ethetha neentatheli ekuqaleni kweveki. Isizini yonyaka ka2025 ibintle ngoba Amabhokobhoko asabethwe kabini kuphela emidlalweni elishumi elinesine ayidlalileyo.