USipho Mbule uveza okufunwa ngaBafana Bafana kwi2025 AFCON ezayo!
USipho Mbule esenza adume ngazo emdlalweni obuphakathi kwaBafana Bafana neZambia kwimpelaveki edlulileyo.
Image: Facebook
UMzantsi Afrika uphinde wenza ezibukwayo, kweli ityeli, eGqeberha. Emdlalweni wobuhlobo obubanjelwe eNelson Mandela Bay Stadium emalanga woMgqibelo odlulileyo, uMzantsi Afrika ucambalalise iZambia ngamagowuli amathathu kwelinye nakubeni bekuqale kwanzima.
Kuyiwe kwixesha lokuphumla aBafana Bafana benkqenkqeza phambili ngegowuli elinye elifakwe sisiququ, uOswin Appollis. Igowuli lithe gqi ekuthambekeni kwesigaba sokuqala esilawulwe liqela likaHugo Broos obengafuni enye into ngaphandlwe kwempumelelo.
Kwisigaba sesibini somdlalo, umqeqeshi wenze iinguqu eziliqela. Phakathi kwabadlali abangenileyo bekukho uSipho Mbule ofike wenza umahluko omkhulu ebaleni. UMohau Nkota, ongene njengelalela naye, ubhakuzelise umnatha ngebhola ayidlalelwe ngobuchule nguMbule.
Emva koko ugalele naye uSphephelo Sithole batsho bakhokela aBafana Bafana ngamagowuli amathathu. Nangona kube njalo, iZambia ikwazile ukufumana igowuli lesibini kanye phambi kokusongwa komdlalo obumhle eGqeberha.
Ngenxa yomsebenzi awenzileyo ebaleni, uMbule ufumene iwonga lomdlali oqaqambileyo emva komdlalo. Uvakalise ukwaneliseka ngumsebenzi abawenzileyo abadlali ebaleni watsho eveza nokuthethwe ngumqeqeshi ngexesha lokuphumla.
"Phambi komdlalo, umqeqeshi usixelele ukuba ayingomdlalo wobuhlubo lo. Uthe ufuna silungiselele iAfrica Cup of Nations," utshilo uMbule echwayitile kuSABC Sport. ABafana Bafana baza kubekwa phantsi kweliso elibukhali ngamanye amazwe emva kokuvala iAFCON edlulileyo kwindawo yesithathu.
"Kundivuyisa kakhulu ukudlalela iqela lesizwe kwakhona. Ndicinga ukuba sonke sidlale ngendlela ebefuna ngayo umqeqeshi. Sifuna ukudlala kakuhle kwiAFCON emva kokufumana indawo yesithathu kwegqithileyo.
"Abadlali sinabo, umqeqeshi sinaye - kufuneka sibumbane njengeqela senze umsebenzi," utshilo uMbule obuyele kwiqela lesizwe emva kokudlala ngendlela encomekayo kwiPirates kule sizini. Amalungiselelo weAFCON aza kuqala kwiveki yesibini kwinyanga ezayo.