ULafitte uqinisekile ngowisa iPirates emdlalweni weCarling Knockout Cup
Abadlali beMarumo Gallants emva kokubetha iGolden Arrows emdlalweni weCarling Knockout Cup obuseKing Zwelithini Stadium.
Image: Marumo Gallants
Emva kokuqhuba kakuhle emdlaleni ogqithileyo, uAlexandre Lafitte uthi uqinisekile ukuba iMarumo Gallants iza kuqhuba kakuhle emdlalweni wokugqibela weCarling Knockout Cup.
ULafitte, 28, uvakalise ukuchulumanca kwakhe okuphenjelelwe yimpumelelo yeMarumo Gallants ebethe iGolden Arrows ngo'4-2 kwiipenela emdlalweni weCarling Knockout Cup obubanjelwe eKing Zwelithini Stadium kwiveki ephelileyo.
Oku kwenzeke emva kokuba la maqela egqibe umdlalo nexesha likasompempe ebambene ngamagowuli amabini. IMarumo Gallants, ezinze eBloemfontein, iza kudibana neOrlando Pirates emdlalweni wokugqibela weCarling Knockout Cup oza kube usePeter Mokaba Stadium ngomhla wesithandathu kweyoMnga.
ULafitte uxelele amajelo eendaba ukuba iMarumo Gallants inabadlali abanokuwenza umsebenzi ibuye nendebe eFreyistata.
Kwelinye icala, iPirates iza kube isilwela ukuphakamisa indebe yayo yesibini kule sizini eqhubekayo phantsi kwesandla somqeqeshi okhoyo ngoku, uAbdeslam Ouaddou, ofuna ukuvala isikroba emva kokukhutshwa kwePirates yakhe kwiCAF Champions League.
"Ndicinga ukuba ndinalo iqela elingawenza umsebenzi. Iingqondo zethu sizibeke entweni esiyifunayo. Ndiqinisekile ukuba siza kuqhuba kakuhle xa sidibana nePirates noxa umdlalo usekude nje," utshilo uLafitte emva komdlalo ogqithileyo.
Ukuzithemba kuye kuphezulu ngoba iMarumo ikhe yayibetha iPirates emdlalweni weBetway Premiership ekuqaleni kwesizini. "Sayibetha iPirates emdlalweni ogqithileyo. Emidlalweni esiza kuyidlala, kufuneka sifumane amanqaku amahlanu ubuncinane phambi kokudibana nayo.
"Sifikelele kwisigaba sokugqibela setumente. Xa ukuso, udlalela ukuphumelela kuphela. Sinethuba lokuzilungiselela kakuhle nokuhlalutya indlela edlala ngayo iPirates," utshilo umqeqeshi phambi kokuncoma uWashington Arubi owenze indima ebonakalayo endleleni yeMarumo Gallants kwiCarling Knockout Cup.
"Emidlalweni enje, uArubi uyazonwabela iipenela kakhulu. Ungumdlali okwaziyo ukuziqaqmbisa ngamaxesha anzima," utshilo uLafitte osecicini lokuphumelela indebe yakhe yokuqala eMzantsi Afrika.