uAbdeslam umncomile uMbuthuma ongcwabe iGolden Arrows
UYanela Mbuthuma unconyiwe ngumqeqeshi wakhe emva kokunceda i'Orlando Pirates ebethe iGolden Arrows emdlalweni weBetway Premiership.
Image: ORLANDO PIRATES
Emva kokwenza umsebenzi oncomekayo emdlalweni wayizolo, uYanela Mbuthuma unconyiwe kakhulu ngumqeqeshi wakhe.
Oku kwenzeke emva kokuba i'Orlando Pirates ingombe iGolden Arrows ngamagowuli amathathu kwelinye emdlalweni weBetway Premiership otake iintlantsi eking Zwelithini Stadium ngorhatya izolo.
UMbuthuma, ongene kwisigaba sesibini, ubhakuzelise umnatha kabini yatsho yaphuma engxakini iPirates ebibambene neGolden Arrows. Ibingekho kokuqala le folosi ingena emdlalweni ifake igowuli.
UMbuthuma, obakade edlalela iRichards Bay, ubuye ngamandla emva kokuba ephose ipenela emdlalweni weCAF Champions League ophunyelelwe yiSaint Eloi Lupopo kwiiveki ezidlulileyo.
Okwenzeke izolo kuza kufunqula ukuzithemba kuyo kumnike nethuba lokuqala imidlalo phantsi komqeqeshi wakhe, uAbdeslam Ouaddou, ozimisele ukubanika amathuba alinganayo abadlali.
Ethetha emva komdlalo wayizolo, uAbdeslam uthe uMbuthuma ngumdlali osoloko edlala ngokuzimisela ngamaxesha onke xa esebaleni.
"Ndifuna ukuthetha ngendlela adlale ngayo namhlanje. Andifuni ukuya kokwenzeke sidlala neLupopo. Into endingakuxelela yona kukuba uMbuthuma udlala kakuhle kakhulu," utshilo umqeqeshi echwayitile.
"Njalo xa simdinga, wenza umsebenzi wakhe kakuhle kwiPirates. Wenza into esiyilindeleyo kubo bonke abadlali bePirates. Siyavuya xa abadlali bedlala kakuhle ebaleni.
"Ndiyavuyisana naye kwaye ndifuna ukuthi makaqhubele phambili nomsebenzi wakhe omhle," utshilo uAbdeslam. IPirates inyukele kwindawo yesibini emva komdlalo wayizolo.