Kutheni uBroos esithi uHelman Mkhalele ukufanele ukuqeqesha aBafana Bafana
UHelman Mkhalele ubonwa njengofanele isikhundla nguHugo Broos oza kuthatha umhlalaphantsi kunyaka.
Image: Itumeleng English/Independent Newspapers
Njengokuba kulindeleke iSouth African Football Association (Safa) ikhangela umqeqeshi oza kungena endaweni kaHugo Broos okhoyo ngoku, ingxoxo ngofanele isikhundla seyiqalile.
Kulindeleke ukuba uHugo Broos athathe umhlalaphantsi emva koko abuyele eBelgium kowabo xa kuphela itumente yehlabathi kunyaka ozayo. ABafana Bafana baza kuthatha inxaxheba okokuqala emva kweminyaka elishumi elinesihlanu kwimidlalo yeFIFA World Cup.
Bagqibela ngonyaka ka2010 ngethuba isengethwe nguMzantsi Afrika. Noxa kungecaci ukuba ngubani indoda eza kuthatha esona sihlalo esitshisayo ebholeni yaseMzantsi Afrika, yena uBroos ubona uHelman Mkhalele njengoyena mqeqeshi ekufanele athathe iintambo emva kwakhe.
Umqeqeshi ukuthethe oku encokweni yakhe neentatheli izolo eGoli. UBroos wafika eMzantsi Afrika ngonyaka ka2021 emva kokususwa kukaMolefi Ntseki owayebambe emva kukaStuart Baxter.
Eminyakeni emihlanu, uBroos uthathe aBafana Bafana wabasa kwiAFCON (amatyeli amabini) nakwitumente yehlabathi. UBroos uthi ukuchongwa kukaMkhalele endaweni yakhe kwakunceda ngokuqinisekisa ukuba umsebenzi owenziwe eminyakeni edlulileyo awuphasalaki.
"Ukuba kungena uMkhalele emva kwam, uza kuqhubela phambili nomsebenzi ebesihleli siwenza. Kodwa yena uza kudlalisa ngendlela yalapha ngoba mna ndingowaseYurophu," utshilo uBroos. "Indlela acinga ngayo uMkhalele uyafana neyam.
"Yiyo lo nto ndikuthanda ukusebenza naye. Ingxaki anayo kukuba akanaso isetifiketi sokuqeqesha. Kufuneka ayokufunda ukuze yenzeke lo nto. Ndimdala mna, andikwazi ukuhlala ndiqeqeshe aBafana Bafana," utshilo uBroos.