Amakhosi angena kwisigaba esibalulekileyo seCAF Confederation Cup!
Amakhosi aza kudibana neAS Simba emdlalweni weCAF Confederation Cup emalanga ngoMgqibelo.
Image: KC/Facebook
Amakhosi alungiselela ukuntingela eDemocratic Republic of Congo - apho aza kudibana khona neAS Simba emdlalweni weCAF Confederation Cup ekulindeleke kudlane iintsimbi kuwo.
Oku kwenzeka emva kokuba Amakhosi enze umtsi oya phambili ngokubetha iKabuscorp SCP emdlalweni obukwinyanga ephelileyo. Nangona iKaizer Chiefs isiya emdlalweni obalulekileyo inokuqhwalela okuthile emva kokugxothwa kukaNasreddine Nabi - kodwa kuye kwaqinisekiswa ukuba uKhalil Ben Youssef noCedric Kaze baza kukhokela.
IChiefs iya emdlalweni olandelayo kumnandi ngoba bakhona abadlali bayo abatsha abebengekadlali kule sizini. Owokuqala nguMfundo Vilakazi obedlalela Amajita kwiFIFA Under-20 World Cup kwiiveki ezidlulileyo.
Amakhosi amkele uLuke Baartman noAsanele Velebhayi abanikwe ilungelo lokudlala emva kokumangalelwa yiCape Town Spurs ebingafuni badlale ingafumananga intlawulo ngabo. Ngethamsanqa labo, iSafa iyalele abaphathi beSpurs ukuba bakhulule abadlali bobabini ngoba abophulanga umthetho ngokushiya iqela labo elithotyiselweyo.
Abalandeli beChiefs bangafumana ukubona abadlali babo abatsha ekukudala bebalindile. Noxa kungekacaci kakuhle, uNkanyiso Shinga, Ethan Chislett, uEtiosa Ighodaro noLebohang Maboe basondele nabo ekudlaleni emva kokuphazamiseka ekuqaleni kwesizini.
Amakhosi aza kulwela ukubuya enento ayiphetheyo emdlalweni oseLubumbashi emalanga ngoMgqibelo. Kubalulekile ukulwela ukuphumelela ngokucacileyo ukuze akwazi ukuphumelela umdlalo wesibini aza kuwudlalela ekhaya phambi kwabalandeli.
Emva komdlalo ngempelaveki, iChiefs kufuneka ibaleke kakhulu ibuyele ekhaya ukuze ilungiselele ukudibana neAS Simba emdlalweni wesibini weCAF Confederation Cup oza kube useDobsonville Stadium, eSoweto, ngomhla wamashumi amabini anesithandathu kwiveki ezayo.
Ukuze iChiefs ingene kwesona sigaba esibalulekileyo kwiConfederation Cup, kunyanzelekile iqhube kakuhle emidlalweni emibini ejamelene nayo. Phakathi kwiveki ezayo, Chiefs iza kudibana neSiwelele FC emdlalweni weBetway Premiership.