UMzantsi Afrika ungombe iRwanda wangena kwiFIFA World Cup uncedwa yiNigeria
ABafana Bafana babethe iRwanda emdlalweni obubanjelwe eMbombela Stadium namhlanje.
Image: Uthunyelwe
Kugqityiwe, uMzantsi Afrika uzibekele indawo kwiFIFA World Cup ekunyaka ezayo. Oku kwenzeke emva kokuba ungombe iRwanda ngamagowuli amathathu eqandeni emdlalweni obubanjelwe eMbombela Stadium, eMpumalanga. Amagowuli ancede aBafana Bafana afakwe nguThalente Mbatha, Oswin Appollis noEvidence Makgopa.
Kodwa yiNigeria evule indlela yaBafana Bafana ngokubetha iBenin ebikwindawo yokuqala. UMzantsi Afrika uzibhaqe usengxakini kwiiveki ezidlulileyo emva kokuthethelwa amanqaku amathathu yiFIFA. Kuyiwe kwixesha lokuphumla aBafana Bafana behamba phambili ngamagwuli amabini eqandeni.
Amakhwenkwe kaHugo Broos ayigqagqanisele iRwanda abhakuzelisa umnatha kwangoko emdlalweni. Oku kwenzeke emva kokuba uThalente Mbatha efake ibhola emshiye ezisola unozinti weKaizer Chiefs.
UMzantsi Afrika khange uyeke ukuzama emdlalweni. Phakathi kwisigaba sokuqala, uOswin Appollis ufake igowuli lesibini emva koku msebenzi omhle owenziwe nguEvidence Makgopa ephakathi emhlabeni kanozinti.
Okuye kwakhuthaza abadlali boMzantsi Afrika kukuba iNigeria ikhawulezise yabhalisa ebhodini komnye umdlalo kaGroup C. Kuyiwe kwixesha lokuphumla ihamba phambili ngamagowuli amabini eqandeni kwiBenin eye emdlalweni iphezulu.
Ucishilele kwakhona uMzantsi Afrika umane uhlasela ungaphezi. Emva kwamashumi ashixhenxe omdlalo, uEvidence Makgopa ufake igowuli lesithathu loMzantsi Afrika yagqitywa tu indlela yawo eya eMelika naseMexico - apho kuza kubanjelwa khona imidlalo yeWorld Cup kunyaka ozayo.