UHugo Broos ophoxekileyo ubeke ithemba lakhe kwiNigeria
USipho Mbule ngomnye wabadlali abathe baqaqamba emdlalweni obuphakathi koMzantsi Afrika neZimbabwe kwiveki ephelileyo eThekwini.
Image: Backpagepix
UHugo Broos ushiyeke ephoxekile emva kokuba aBafana Bafana bengakwazanga ukuphumelela owona mdlalo obalulekileyo. Oku kwenzeke emva kokuba bebambene neZimbabwe ngeqanda emdlalweni obubanjelwe eMoses Mabhida Stadium ngorhatya langoLwesihlanu ogqithileyo.
Ukungaphumeleli kwabo aBafana Bafana kunciphise amathuba wabo okuya kwiFIFA World Cup ekunyaka ozayo ngakumbi ngoba iBenin ikwazile ukongeza amanqaku amathathu emva kokubetha iRwanda ngegowuli elinye eqandeni.
Nangona kukho ukuncipha kwamathuba okuya kwitumente yehlabathi - uBroos akafunanga ukulahla ithemba ngoba ayikagqitywa imidlalo.
UMzantsi Afrika uzibhaqa sowubeke ithemba lawo kwamanye amazwe ngoba uthathelwe amanqaku amathathu ekuqaleni kwale nyanga ngenxa yokudlalisa uTeboho Mokoena enamakhadi atyheli amabini emdlalweni owagqithayo.
Ukoxuthwa kwamanqaku amathathu kususe uMzantsi Afrika kwindawo yokuqala kuGroup C kwenyukela kwindawo yokuqala iBenin enethemba lokuya kwitumente yehlabathi.
"Lusuku olubi kakhulu olu kuthi. Besisazi ukuba umdlalo uza kuba nzima - kodwa ndicinga ukuba khange sibenayo ilaka ngoba besinawo amathuba okufumana igowuli emdlalweni," utshilo uBroos emva kokubanjwa yiZimbabwe evuye ngokungathi iya kwitumente yehlabathi.
"Iibhola zethu zibethe ezipali; wona umdlalo ngesiwufumene. Sidlale neqela elivuyele ukudlala nathi. Siza kuzama ukulungiselela umdlalo oza noxa sixhomekeke kwamanye amaqela. Kunyanzelekile sizame ukulwela ukuya kwiWorld Cup kwakhona.
UMzantsi Afrika uhamba emva kwiBenin ngamanqaku amabini nomahluko wamagowuli amathathu. Wona ukuze ukubuyela kwindawo yokuqala, kufuneka ubethe iRwanda. Kwelinye icala, iBenin kufuneka ibethwe yiNigeria esanalo ithemba lokuya kwitumente yehlabathi.
"Imeko esikuyo inzima ngoku. Asikho ngaphandle ngokupheleleyo - kodwa siza kujonga ngomdla okwenzeka kwiNigeria neBenin. Ukuba siyaphumelela, sakubona okwenzeke komnye umdlalo. Siza kuzama ukukhuthaza abadlali ukuze bazame ukuphumelela umdlalo ozayo," utshilo uHugo Broos.