Uqhwatyelwe izandla uMabasa ozenzele imbali kwiPirates!
UTshogofatso Mabasa udibanise amashumi amahlanu amagowuli emdlalweni obungoLwesibini eSoweto.
Image: Independent
Umqeqeshi weOrlando Pirates, uAbdeslam Ouaddou, ubaqhwabele izandla abadlali ababini abenze umahluko omkhulu emdlalweni odlulileyo. Oku kwenzeke emva kokuba iPirates ibethe iTS Galaxy ngamagowuli amabini emdlalweni weBetway Premiership otake iintlantsi eOrlando Stadium kubusuku bangoLwesibini ekuqaleni kwale veki.
Ikhuthazwa ngabalandeli abebegcwelise ibala, iPirates ihlasele ngamandla emdlalweni yade yafumana ipenela efakwe nguEvidence Makgopa phambi kokutshintshwa kwamacala. Impumelelo ithathe iPirates yayibeka kwindawo yesithathu emva kweMamelodi Sundowns neSekhukhune United ngokulandelelana.
Emva kokubethwa emdlalweni wokuqala kwisizini entsha, iPirates iphumelele imidlalo esixhenxe kungafakwanga gowuli kuyo phantsi kwakhe uAbdeslam Ouaddou onendebe yeMTN8 phantsi kwegama lakhe.
Ukuqhuba kakuhle kwakhe kubonisa injongo ecacileyo yePirates kule sizini emva kokugqwidiza kwisizini edlulileyo. Umqeqeshi uncome uMasindi Nemtajela noTshegofatso Mabasa emva kokwenza umsebenzi omhle.
UNemtajela ufumene iwonga lomdlali oqaqambileyo emdlalweni eqala ukudlalela iPirates kule sizini eqhubekayo. "Ndinexesha elide ndimazi uMasindi ngoba bendingumqeqeshi wakhe kwiMarumo Gallants. Bekufanele ukuba wafumana kudala ithuba lokudlala - kodwa sathi ixesha lakhe liyeza," utshilo uAbdeslam echwayitile emva komdlalo.
"Ixesha lakhe liye lafika naye wasibonisa ukuba ungumdlali osemgangathweni ophezulu. Ndonwabile ngoba siphumelela kakuhle futhi akufakwa magowuli kuthi. Bekunzima ukudlala neTS Galaxy ngoba iqhuba kakuhle. Kodwa ndicinga ukuba sithi abakufaneleyo ukuphumelela umdlalo," utshilo umqeqeshi kwiSuperSport TV phambi kokuncoma uMabasa ofake igowuli lesibini emdlalweni.
Ngoku ewonke amagowuli wakhe kwiPirates angamashumi amahlanu. Kulindeleke ukuba amodlule uTso Vilakazi onamagowuli amaninzi kwiPirates. "Ndiyamvuyela uMabasa. Kudala ndatsho ukuba ndinabadlali abadlala kakuhle. Ndicinga ukuba yinto eqhelekileyo emaqeleni amakhulu njengePirates," utshilo uAbdeslam.