Izimisele ukubhena iSafa egqejwe elingophiyo ngomba kaMokoena
iSouth African Football Association iza kusilwa isigwebo egxizwe ngaso yiFIFA ngomba kaTeboho Mokoena owadlaliswa enamakhadi amabini awafumeneyo.
Image: Itumeleng English Independent Newspapers
Umbutho olawula ibhola ekhatywayo eMzantsi Afrika, iSafa, uzimisele ukwenza isibheno emva kokuba iFIFA ikhuphe isigwebo esidakumbisayo ngomba kaTeboho Mokoena.
Ekuqaleni kwale veki, iFIFA yoxuthe amanqaku amathathu kuMzantsi Afrika ngenxa yokudlaliswa kukaMokoena emdlalweni ohlakulela itumente yehlabathi owadlulayo engafanelanga. Kuloo mdlalo, aBafana Bafana babetha iLesotho ngamagowuli amathathu eqandeni eKwindla kulo nyaka.
Kwakungafanelanga ukuba udlalisiwe uMokoena onikwe isilumkiso ngoba wayefumene amakhadi amabini emidlalweni egqithileyo. Ngaphezulu kokuthathwa kwamanqaku amathathu, iSafa ithiwe nka ngomdliwo wemali eyiR216 000.
Okwenzekileyo kuthathe aBafana Bafana kwindawo yokuqala baya kwindawo yesibini ezantsi kweBenin kuGroup C. Nangona uMzantsi Afrika uthiwe wambu lihlazo elenziwe yimpazamo ekwakufanele ukuba ibonwe kwangoko ngumphathi weqela, wona uyalingana ngamanqaku neBenin eseza kudlala neNigeria ekwindawo yesithathu.
Kwingxelo ebhaliweyo, iSafa ivakalise ukudana sisigqibo esithathwe yiFIFA. "SinguSafa sidanile yinto esingazange siyibone isenzeka. Isigqibo sithathwe lilungu lekomiti elinye elingasinikanga izizathu nokusinika ithuba lokuzithethelela," utshilo ingxelo ekhutshwe yiSafa.
Phambi kokufaka isicelo sokubhena, iSafa icele ukunikwa izizathu yiFIFA phambi kokuphela kweentsuki ezilishumi ezimiselweyo. Nangona amanye amazwe ebembomba ngethuba iFIFA ithe cwaka - kodwa iLesotho eyachaphazelekayo zange ifake isikhalazo ngokukhawuleza.
Kungenzeka ukuba iSafa iza kubambelela kuloo nto xa isenza isicelo sesibheno. Kunyanzelekile uHugo Broos aqinisekise ukuba aBafana Bafana baphumelela kakuhle kuyo yomibini imidlalo eshiyekileyo.
Nangona ukuthathelwa amanqaku amathathu kuyinto etyhafisayo - kodwa lisekhona ithemba. Kunyanzelekile uMzantsi Afrika uyibethe kakhulu iZimbabwe emdlalweni oza kudlalelwa eMpumalanga ngomhla weshumi.
Emva koko ngomhla weshumi elinesine, uMzantsi Afrika kufuneka uphinde ubethe iRwanda ukuze uqinisekise ukuba ubhukuqa iBenin eza kudibana neNigeria esenethemba lokuya kwiWorld Cup.