USiya Noboko ucacisa okufunwa yiKomga United kule sizini yeBrutten
USiyamthanda Noboko uvakalise uvuyo olukhulu emva kokuba iKomga United ayidlalelayo ibethe iProgress emdlalweni weBrutten obanjelwe ePolice Park Stadium, eMonti, kwiveki ephelileyo.
Image: Pedro Mapelo/I'solezwe lesiXhosa
Omnye wabadlali abanekamva eliqaqambileyo embhoxweni, uSiyamthanda Noboko, uvakalise uchulumanco olukhulu emva kokufumana ithuba lokunceda iqela lakhe kwitumente yembhoxo ekuthiwa yiBrutten eqale isizini yayo yesibini kutshanje.
UNoboko uvakalise indlela aziva ngayo emva kokuba iKomga United ivuthulule iProgress ngo'34-17 emdlalweni otake iintlantsi ePolice Park, eMonti, ngentsasa yoMgqibelo odlulileyo. Emva kokubethwa kakubi emdlalweni wokuqala weBrutten, iKomnga ikhuphele umsindo wayo kwiProgress yatsho yanyukela kwindawo yesibini kuPool A.
USiyamthanda ugoduke encumile emva kokunikwa ibhaso lamakhulu amahlanu eerandi (R500) emva kokwenza indima ebonakalayo kwimpumelelo yokuqala ezuzwe yiKomga United kwiveki ephelileyo.
"Ndonwabe kakhulu emva kokufumana iwonga lomdlali oqaqambileyo emdlalweni. Okundonwabise kakhulu kukuba kwenzeke obekufunwa liqela emdlalweni wanamhlanje. Nangona ndidlaliswe endaweni endingayiqhelanga – kodwa ndivuyiswa yindlela endisebenze ngayo," utshilo uSiyamthanda encumile emva komdlalo.
Nakubeni efumene iwonga, uyibethelele into ethi iKomga United isebenzela ukuya emdlalweni wokugqibela weBrutten kule isizini. "Umqeqeshi ndimbonisile ukuba ndiyayifuna le nto futhi ndidlale ngokukhulu ukukhululeka. Eyona nto endiyinqwenelayo kukubona iKomga United iqhuba kakuhle kwiBrutten.
"Ndingavuya kakhulu ukuba singavala itumente siziintshatsheli. Asiqhubanga kakuhle emdlalweni wethu wokuqala. Sibuye ngamandla kulo wesibini ngoba besilungisa iimpazamo esizenzileyo emdlalweni wokuqala," uvale ngaloo mazwi uSiyamthanda.
Kweminye imidlalo, iWSU Eagles iphulukene nomdlalo wesibini emva kokubethwa yiBuffs ngo'35-32 emdlalweni obunzima. Abatshakazi, iRising Stars, babuye ngamandla bazibethela iBerlin Tigers ngo'41-10 emdlalweni wesibini wesizini.
Emdlalweni wokugqibela ePolice Park, iYoung Leopards izuze impumelelo ngokubetha iEL Police ngo'17-10. Ihleli phezulu iBuffs emva kokuphumelela kabini kuPool A. Kanti kuPool B kukhokela iRising Stars enamanqaku amathandathu. Imidlalo iza kubuyela eSisa Dukashe Stadium, eMdantsane, emva kweeveki ezimbini.