Aya emdlalweni olandelayo ekelemile Amabhokobhoko!
Amabhokobhoko aza kuzama ukukhuphela umsindo wawo kwiNew Zealand emdlalweni wesibini ongoMgqibelo.
Image: Springboks
Emva kokubethwa ngo'24-17 emdlalweni obunzima kwiveki ephelileyo, Amabhokobhoko alungiselelo ukuziphindesela kolandelayo. Oku kuza kwenzeka xa Amabhokobhoko evana amandla neNew Zealand emdlalweni wesibini weCastle Lager Rugby Championship oza kube ngentsasa (09:05) yangoMgqibelo.
Kulindeleke umdlalo utake iintlantsi ngoba omabini amaqela aza kulwela ukuphumelela. UMzantsi Afrika, ozikhotha amanxeba emva kokubethwa, ulungisa iimpazamo ozenzileyo enkampini phambi komnye umdlalo omkhulu.
Kunyanzelekile Amabhokobhoko ayibethe iNew Zealand ukuze abuyele kwindawo yokuqala embhoxweni wehlabathi. Ngaphezulu koko, yimpumelelo kuphela engawanika ithuba lokukhusela indebe yeRugby Championship. Wenze iinguqu eziliqela uRassie Erasmus phambi komdlalo wale veki.
UDamian Wiilemse noCanan Moodie baza kuqala umdlalo kwiindawo zikaDamian de Allende noJesse Kriel obenguKapteni emidlalweni emibini egqithileyo. Ugciniwe uCheslin Kolbe kwabuyiswa uAphelele Fasi obengadlalanga emdlalweni ogqithileyo.
"Abadlali abangene mva emdlalweni ogqithileyo balinike amandla okulwa iqela," utshilo uErasmus ezama ukuveza isizathu esibangele enze iinguqu. "Indlela abadlale ngayo inefuthe kwindlela esiza kuya ngayo emdlalweni ozayo. Njengokuba sikwindawo yesibini kwihlabathi, ukuba singaphumelela lo mdlalo esiya kuwo, siza kufumana amandla okulwela iRugby Championship.
"Sisesendaweni entle kumanqwanqwa ehlabathi. Abanye abadlali basaphoxekile ngokufanayo nam – kodwa boyiswe bezamile," utshilo umqeqeshi. USiya Kolisi, obebanjelwe nguKriel, uza kukhokela Amabhokobhoko kwakhona xa ephinda emva kwendlu neNew Zealand eyingozi kakhulu phambi kwabalandeli bayo.
Nakwicala lombhoxo wamanenekazi, uMzantsi Afrika uza kuzama ukuwisa iNew Zealand emdlalweni wetumente yehlabthi emini ngoMgqibelo.