UNgcobo uthi iChiefs ingayibetha kwakhona iMamelodi Sundowns

Amaqela amabini amakhulu ebholeni ekhatywayo eMzantsi Afrika aza kunyathelana kube mdaka iisali namhlanje emdlalweni obalulekileyo.

Oku kuza kwenzeka xa iKaizer Chiefs isamkela iMamelodi Sundowns emdlalweni weBetway Premiership oza kube useFNB Stadium ngentsimbi yesixhenxe namhlanje ngorhatya. IChiefs iya emdlalweni wesine ikhuthazekile emva kokubetha iStellenbosch FC, iPolokwane City neRichards Bay ngokulandelelana.

Ngoku uhleli kwindawo yesibini emva kweSekhukhune United enamagowuli amaninzi. Kwelayo iSundowns inamanqaku asixhenxe. Yadlala ntaanganye neChippa United, yabetha AmaZulu neMagesi FC ngokulandelelana.

Iya kwiChiefs isophisa kodwa emva kokukhutshwa yi'Orlando Pirates kwiMTN8 Cup ehamba neshumi lesigidi zerandi. Amakhosi abetha iSundowns ukuze aphakamise iNedbank Cup kwisizini ephelileyo.

UNkosingiphile Ngcobo, 25, uthi iChiefs ingayiphinda lo nto ngoba bayenza emdlalweni wokugqibela phakathi kwala maqela kwisizini ka2024/25. "Amalungiselelo wethu mahle njengesiqhelo xa sisiya emidlalweni," utshilo uNgcobo.

"Sisoloko siseebenzela ukwenza umsebenzi ongcono singabadlali. Ndonwabile kokwenzeke emidlalweni egqithileyo kodwa ndifuna ukwenza ngcono," utshilo uNgcobo ongadlalanga kakuhle kwisizini egqithileyo ngenxa yokonzakala.

Njengomdlali omdala kwiChiefs, kuza kujongwa kuye ngabaqeqeshi nabalandeli abalangazelela impumelelo. Amakhosi asebenzela isizini engcono emva kokuphoswa yiTop-8 iminyaka elandelelanayo. Iza kufika inomsindo iSundowns emva kokubethwa yiPirates kwiveki ephelileyo.

"Emdlalweni ogqithileyo, ndicinga ukuba sabonisa ukuba singayibetha iSundowns. Indlela esasicwangcise ngayo emdlalweni ogqithileyo yasisebenzela kakhulu. Okwethu kukuqhubela phambili nesakwenzayo.

"Siyazi ukuba iSundowns ifuna ukugcina ibhola. Kufuneka sidlale kakuhle emva sizame nokuyihlasela xa kuvela amathuba," utshilo uNgcobo.