iChippa United ivula isizini ngomdlalo onzima eGqeberha!
iChippa United iza kuthathana neMamelodi Sundowns emdlalweni weBetway Premiership oza kube useGqeberha emalanga ngoMgqibelo.
Image: Maya Images
Emva kweenyanga ezimbini amaqela adlala kwiPremier Soccer League esekhefini, isithukuthezi siphelile kubalandeli bebhola ekhatywayo. Onke amaqela aza kudlala imidlalo yayo yokuqala yeBetway Premiership ngempelaveki kwiindawo ngeendawo eMzantsi Afrika.
Phakathi kwemidlalo yeBetway Premiership eza kujongwa kakhulu ngabalandeli bebhola ekhatywayo ngophakathi kweChippa United neMamelodi Sundowns eziintshatsheli ngentsimbi yesithathu emalanga ngoMgqibelo, eNelson Mandela Bay Stadium.
Emva kokuba iChippa United iphoswe kukungena kwiTop 8 ngomzuzu wokugqibela, kwisizini entsha iza kulwela ukwenza umsebenzo obhetele. Iza kukhuthazwa kukuba kudlule iisizini ezimbini zilandelelana ikude ezembeni ebelithande ukuyiqhela.
USinethemba Badela uza kuxhuzula imikhala njengomqeqeshi omtsha weChippa United eshiywe nguThabo September kwiinyanga ezidlulileyo emva kokuvakala kweendaba ezithi uMnu. Siviwe Mpengesi wayecinga ngokumsa ezantsi kwiMultiChoice Diski Challenge emva kokuphosa iTop 8.
Ngelishwa layo iChippa United iza kudibana neSundowns emdlalweni wayo wokuqala weBetway Premiership. Idibana neentshatsheli ezifuna indebe kwakhona emva kokungcwaba iRichards Bay ngamagowuli amane eqandeni emdlalweni weMTN8 obubanjelwe eLucas Moripe Stadium kwiveki ephelileyo.
UBadela uza kulwela ukuqala kakuhle njengomqeqeshi phambi kwabalandeli beChippa edlalela ekhaya. Abantu abaninzi baza kuyakhela umkhanyo iChippa United ngoba ikhulule inqwaba yabadlali abanamava ekupheleni kwesizini.
Nakubeni kunjalo, iChippa isenabo abadlali abasemgangathweni abaquka uStanley Nwabali, uAyabulela Konqobe noGiovanni Philander. Umdlali omtsha, uThulani Mini, ngomnye wabadlali abaza kujongwa kakhulu.
Kwelakhe icala uMiguel Cardoso, uza kutyhala ngabadlali abaquka uTebogo Mokoena, Iqraam Rayners noGrant Kekana phakathi kwabanye abadlali. Noxa ikamva labadlali abafana noPeter Shalulile, uKhuliso Mudau noLucas Riveiro lisathandabuzeka – kodwa iSundowns inabadlali abanokumelana nomsebenzi nanini.