Ukuwongwa kufumene indawo entliziyweni yakhe uElvis Chipezeze!

Unozinti weMagesi FC, uElvis Chipezeze, ulamkele ngovuyo olukhulu iwonga alifumeneyo ekuqaleni kwale veki. Oku kwenzeka emva kokuba uChipezeze enikwe iwonga lomdlali oqaqambileyo kwiCarling Knockout Cup yonke. Iwonga liphawula igalelo elikhulu elenziwe ngulo nozinto waseZimbambe kwiqela lakhe.

UChipezeze ngomnye wabadlali abathe baqaqamba kwisizini yePremier Soccer League ka2024/25 nakubeni iMagesi FC ikhe yanethuba elide ibambeke kwidabi lokuphepha izembe. Yenze imbali iMagesi FC ngokuphakamisa indebe yeCarling Knockout iqala ukudlala kwinqanaba eliphezulu emva kokunyuselwa kwiMotsepe Foundation Championship kunyaka ophelileyo.

Kwenzeka oku ngenxa yabadlali abaliqela abanamava abaquka uChipezeze oneminyaka edlala ibhola ekhatywayo eMzantsi Afrika. Phambi kokuzibalula kwiMagesi kwisizini egqithileyo, uChipezeze wazibonakalisa kwiBaroka FC yaseLimpopo kwiminyaka engaphambili.

Kwiwonga alifumeneyo, ubethe abadlali abaquka uIqraam Rayners noEdmore Chirambadare. "Okokuqala, ndifuna ukubulela iwonga endilifumeneyo. Yinto enkulu kakhulu kum le yokuba ngumdlali obalaseleyo kwitumente yonke," utshilo uChipezeze.

"Ndifuna ukubulela oogxa bam, umqeqeshi wam woonozinti nosihlalo weqela lethu ngokundinika ithuba nenkxaso. Okwenzeke kwisizini yokuqala yinto enkulu kakhulu kwiMagesi. Sifumene indebe, into ekhethekileyo kakhulu. Ndifuna nokubalula inkxaso esiyinikwe ngabalandeli bethu," utshilo unozinti weMagesi eyabetha iMamelodi Sundowns kwiCarling Knockout Cup.

Emva kokuba iMagesi FC isindiswe ezembeni nguOwen Da Gama ohambileyo, uChipezeze uthi bazimisele ukwenza ngcono. "Sinomsebenzi omninzi ophambi kwethu. Yinto ekhethekileyo kum le ndiyifumeneyo - kodwa kufuneka siphinde sisebenza kwakhona kwisizini yesibini.

"Thina sinalo ithemba lokuhle njengokuba sinabadlali abatsha. Kufuneka sisebenze ngokuzimisela siye phambili," utshilo uChipezeze.