Kuqalwa amalungiselelo emidlalo yeCricket World Cup ezayo eMonti
USibulele Ngongo, okhokela isebe lezeMidlalo, ubambe intlanganiso neqela elilungiselela imidlalo yeqakamba eMonti kule veki.
Image: DSRAC
Amalungiselelo wetumente yehlabathi kwiqakamba aqaliwe eMonti. Oku kubhengezwe nguMphathiswa wezeMidlalo kwiphondo leMpuma Koloni, uSibulele Ngongo, emalanga ngoLwesibini kule veki. Iintloko zesebe lezeMidlalo, ezeCricket South Africa nezeBuffalo City Metro ziye zabamba intlanganiso kule veki eMonti apho kuye kwasungulwa khona igqiza eliza kwenza amalungiselelo.
Kunyaka ophelileyo kuye kwabhengezwa uMzantsi Afrika njengelizwe eliza kusingatha itumente yehlabathi kwiqakamba ubambisene namazwe amabini, iZimbabwe neNamibia, angoomakhelwane. Ngethamsanqa, iMpuma Koloni ineendawo ezimbini eziza kusingatha imidlalo yeqakamba ekwinqanaba lehlabathi.
EGqeberha, imidlalo iza kubanjelwa eSt George's Park, kanti eminye iza kudlalelwa eBuffalo Park, eMonti. Ezinye iindawo ziquka iWanderers eseGoli, iSuperSport Park yodumo eseCenturion, iNewlands eseKapa, iMangaung Oval eseBloemfontein neKingsmead eseDurban.
Ukukho kweendawo zokuhlala nezikhululo zeenqwelomoya zezinye zezinto ezincede iindawo ezikhethiweyo ngaphezulu kweBenoni, iPotchefstroom neKimberly eziphosiweyo. Ethetha emva kwentlanganiso, uNgongo uvakalise uchulumanco ngokuqala komsebenzi oza kwenzeka.
"Sichulumance kakhulu ukwazisa abantu ukuba iBuffalo City iza kusingatha imidlalo yeCricket World Cup ngonyaka ka2027. Ndisentlanganisweni nabaphathi beBuffalo City neCricket SA ngoba sifuna ukuseka iqela eliza kuqala amalungiselelo etumente yehlabathi," utshilo uMphathiswa.
"Sazi kakuhle ukuba akukho nto efunqula uqoqosho njengezemidlalo. Umzila oza kushiywa kukudlalelwa kwetumente yehlabathi akunambaliso. Siza kuphakula kwimbali yethu yeqakamba nakwitalente esinayo phambi kwetumente," utshilo uNgongo.