UThamsanqa Mkhize ushiya iCape Town City ayidlalele iminyaka esibhozo
UThamsanqa Mkhize uyahamba kwiCape Town City emva kokuyidlalela iminyaka esibhozo yonke.
Image: CTC/Facebook
Oyena umdlali obenethuba elide edlalela iCape Town City, uThamsanqa Mkhize, uvalelisile okokugqibela kule veki. UMkhize, 36, ulinikela umva iqela laseKapa emva kokuchitha iminyaka esibhozo yonke kulo.
Ngomnye wabadlali abafika kwisizini yokuqaka yeCape Town City eyadlala kwiBetway Premiership emva kokuba uMnu. John Comitis wathenga iMpumalanga Black Aces wayiguqula igama. Oku kwenzeka emva kokuba uComitis wakhutshwa ngendlela engemnandanga kwiCape Town Spurs eyayiphakathi kwiAjax Cape Town eyabhangayo.
Kuyo yonke iminyaka esibhozo, uMkhize ebelelinye lamajoni athembekileyo kwiCape Town City. Eminyakeni ayichithe kuyo ufumene indebe yeTelkom Knockout neMTN8. Ukuhamba kwakhe kwenzeka emva kokuba iCape Town City ithotyiselwe kwiMotsepe Foundation Championship kwinyanga ephelileyo.
Ayiqhubanga kakuhle kwisizini egqithileyo yaphinda ayakwazi ukuphumelela ukugcina indawo yayo kwiBetway Premiership emidlalweni yokuxabangela (PSL PlayOffs). UComitis ebesetshilo ukuba bakhona abadlali abathe abakufuni ukudlala kwiMotsepe Championship.
"Namhlanje ndiziva ndinombulelo ngethuba lokudlala apha iminyaka esibhozo," utshilo uMkhize ogqame kwiCape Town City wade wabonwa nangumqeqeshi weqela lesizwe. UMkhize ngomnye wabadlali basekunene emva abazenzele igama kwiPremier Soccer League.
Akayanga kumaqela amakhulu ngoba ebexatyisiwe yiCity ebizinzile kwicala lezimali. "Ndifumene ithuba lokufezekisa iphupha lam endandinayo ndisengumntana omncinane. Ndifuna ukubulela iqela nabaxhasi abandivulela umnyango. Esikwenze kwiCity kwakuhlala ezingqondweni naphakade," utshilo uMkhize.
Okubi kukuba uyishiya iCity ikwimeko embi ngoba isuke endaweni ebhetele ebholeni ekhatywayo. "Ndifuna ukubulela abalandeli beCape town City abandikhuthazileyo, bandixhasa bandinika nothando.
"Nangona kukubi ukunishiya - kodwa ukuniqinisekisa ukuba ukuba ndiyalibulela uthando enindinike lona," uvale ngaloo mazwi uMkhize kwiqela laseKapa. Akukacaci ukuba uza kuya kweliphi iqela okwangoku. Ngenxa yamava netalente anayo, kungenzeka afumane iqela kwiBetway Premiership kwakhona.