Yamkele inqwaba yabadlali abatsha namhlanje iPirates!
Yamkele abadlali abasixhenxe bonke iOrlando Pirates namhlanje.
Image: Orlando Pirates
Iqhubela phambili i'Orlando Pirates nokwamkela abadlali abatsha. Namhlanje yamkele abadlali abasixhenxe bonke phambi kokuqala kwamalungiselelo esizini entsha.
Abadlali abatsha nguYanela Mbuthuma obedlalela iRichards Bay, uMasindi Nemtajela osuka wiMarumo Gallants, uTshepang Moremi odlalele Amazulu, uNkosikhona Ndaba ozenzele igama kwiRichards Bay, uSinoxolo Kwayiba oziqaqambise kwiChippa United, uTshepo Mashiloane obedalela iBaroka noSihle Nduli obeyinjini yeStellenbosch FC.
Bonke abadlali abafike namhlanje bafika abalandeli bePirates besavuyela uSipho Mbule otyityitywe yiPirates ekuqaleni kwale veki. Kanti phambi kwakhe iPirates ibhengeze igama lomqeqeshi omtsha ogama linguAbdeslam Ouaddou waseMorocco.
Umqeqeshi omtsha uchithe isiqingatha sesizini kwiMarumo Gallants ayisindise ezembeni. Kuthiwa bonke abadlali abatsha baza kuboniswa indlela ekwenziwa ngayo izinto kwiPirates benziwe novavanyo ngoogqirha phambi kokuba badibane nabanye.
IPirates iqeshe umqeqeshi omtsha nabadlali abatsha inethemba lokwenza umsebenzi obhetele ngokufanayo nakwiisizini ezimbini ezigqithileyo phantsi kukaJose Riveiro. Uza kusebenza ephantsi koxinizelelo uOuaddou ngoba ufika kwiPirates enganambali yokuthatha iindebe kumaqela asuka kuwo.
Okunye okuza kumenzela isifuthufuthu kukuba uRiveiro uphumelele iindebe ezininzi esengumqheliswa njengaye. Kodwa ufika kakuhle iPirates imthengele abadlali abasemgangathweni ophezulu. IPirates iza kundulukela eYurophu - apho iza kulungiselela khona isizini entsha.