UCheslin Kolbe uthi baphekwa besophulwa nguRassie enkampini
South Africa's wing Cheslin Kolbe scores a try during the Autumn Nations Series International Rugby Union match between England and South Africa at Allianz Stadium, Twickenham in south-west London UCheslin Kolbe ukhala ngokuqotywa nguRassie Eramus phambi komdlalo ongempelaveki eHDL Stadium, eKapa.
Image: Justin Tallis/AFP
Njengokuba Amabhokobhoko eqala isizini ngempelaveki, abadlali baphekwa besophulwa enkampini nguRassie Erasmus ogxeleshe isiqalo esihle sesizini ka2025. Oku kungqinwe ngumdlali ophambili, uCheslin Kolbe, ekulindeleke ukuba enze indima ephambili emsebenzini weqela lesizwe lombhoxo.
Amabhokobhoko aqala unyaka ngomdlalo ophakathi kwawo neBarbarians oza kube useDHL Stadium, eKapa, emalanga ngoMgqibelo. Sele befikile eMzantsi Afrika abadlali beBarbarians phambi komdlalo obalulekileyo.
Ekuqaleni kwale veki, uKolbe noTony Browns, ongumqeqeshi wabadlali abahlaselayo, bancokole namajelo eendaba malunga namalungiselelo omdlalo omkhulu ongempelaveki. UKolbe uxelele iintatheli ukuba zange abuve ubunzima ejimini kwiminyaka edlulileyo njengalo unyaka.
Akothusi oku ngoba uRassie Erasmus uthe wakha iqela eluliqilima eliza kuqubisana namazwe ayingozi embhoxweni wehlabathi. "La ngawona malungiselelo esizini anzima ukusukela oko ndadlela iSpringboks," utshilo uKolbe, ongumdlali oqine ngaye uMzantsi Afrika.
Uqinisekisile ukuba Amabhokobhoko akazu kulinganisa okwenziwa yiBarbarians ngoba into ebalulekileyo kubo bengabadlali kukwenza umsebenzi ngendlela ekucwangciswe ngayo.
"Iingqondo zethu sizibeke kumalungiselelo wethu phambi komdlalo ongempelaveki," utshilo uKolbe, ekulindeleke ukuba abotshwe nemiqheliswa eza kufunda kuye indlela yokudlalela iqela lesizwe lombhoxo loMzantsi Afrika njengomnye wabadlali abadala.
IBarbarians yintlanganisela yabadlali abasuka kumaqela asemaNgesini, eYurophu. Kudityaniswe abadlali abadlala kwiVodacom United Rugby Championship, iFrench Top 14, English Premiership, Super Rugby noJapan League.
Kudala lamaqela mabini adibana - kodwa aza kudlalela okokuqala ebaleni laseMzantsi Afrika. Amabhokobhoko afune ukudibana neBarbarians phambi kokudibana ne-Italy ngoba ufuna ukuqinisa amalungiselelo wawo phambi komdlalo obaluleke kakhulu kuwo.