Ibuya iphaca iDowns ebethwe yiPyramids emdlalweni weCAF Champions League

Ibuyela ekahaya iphaca iMamelodi Sundowns emva kokuba ibethwe yiPyramids ngamagowuli amabini kwelinye emdlalweni weCAF Champions League obubanjelwe e30 June Stadium namhlanje ebusuku.

Bekunyanzelekile iSundowns iphumelele eYiphutha emva kokuba umdlalo wokuqala waphela ebambene ngegowuli elinye ePitoli kwiveki ephelileyo. IPyramids, ebidlalela phambi kwabalandeli bayo, yothuse iSundowns ngokufaka amagowuli amabini. Elifakwe ngu-Iqraam Rayners aliyincedanga ncama iSundowns.

Kuyiwe kwixesha lokuphumla iPyramids ihamba phambili ngegowuli elinye eqandeni. Igowuli lifakwe nguFiston Mayele oyingozi. Umdlalo uqale ngesantya esiphezulu, omabini amaqela esilwela ukufaka igowuli kuqala. Amasandawana awulawule umdlalo kakuhle esiya phambili.

Into angakwazanga ukuyenza kukudala amathuba acacileyo kwimizuzu yokuqala yomdlalo. Izinto ziguquke emzuzwini wamashumi amabini ananye ngethuba uMayele efaka ibhola ayiphiwe nguGrant Kekana okwentonga yomnquma ebhokisini.

Bekungekho nto enokwenziwa nguRonwen Williams ngoba uMayele ebeyikhabe ngamandla. Ekupheleni komdlalo, uMatthews ufumene ithuba lokufaka igowuli lokulinganisa eyedwa, ibhola yakhe ichithwe ngunozinti oye wazondlala phantsi.

Iqale isiqingatha sesibini iSundowns iphantsi koxinizelelo ngenxa yegowuli elifakwe kuyo kwisigaba sokuqala somdlalo e30 June Stadium ebengagcwelanga ncam. emzuzwini wamashumi amahlanu anesihlanu, uAhmed Samy ufake igowuli lesibini ngentloko.

Ibhola ekhatywe ngaphaya komhlaba kanozinti ifike uSamy eyedwa wayivalela emnatheni. Emzuzwini wamshumi asixhenxe anesihlanu, u-Iqraam Rayners ufake igowuli lokuqala leSundowns kwatsho kwavuka intlantsi yethemba.

Kuye kwanyanzeleka ukuba iSundowns isebenzise ixesha elishiyekileyo ukuze ifumane elinye igowuli ebelifuneka ngoba iPyramids ibihamba phambili ngamabini. Ayikwazanga iSundowns ukufumana igowuli lokulinganisa yabethwa ngo'2-1.