Amajita athiwe jize ngeeHONOR 400 Lite ezixabisa iR250 000
Amajita azamkele ngovuyo izipho aziphiwe nguHONOR emva kokubuya nendebe kwi-Under-20 Africa Cup of Nations yalo nyaka.
Image: HONOR South Africa
Iintshatsheli zeAfrican Cup of Nations (Afcon) Under-20, Amajita, zamkelwe ngezandla ezifudumeleyo kwisikhululo seenqwelomoya samazwe ngamazwe eKempton Park emva kokuzuza impumelelo eYiphutha.
Oku kwenzeke ngentsasa yangoLwesibini kule veki emva kokuba Amajita ebethe iMorocco ngegowuli elinye emdlalweni wokugqibela weAfcon Under-20 kubusuku beCawe edlulileyo. Phakathi kweenkokeli ezamkele iqela lesizwe lebhola ekhatywayo bekukho uMnu. Panyaza Lesufi noMphathiswa weZemidlalo eGateng bephahlwe zizihlwele zabalandeli bebhola ekhatywayo.
Ibikokokuqala uMzantsi Afrika uzuza indebe kwitumente ekudlala abadlali abaselula ngeminyaka. Abalandeli bamamkele ngengoma uPatrick Autata noogxa emva kwetumente ebibanjelwe eYiphutha. Njengekhokeli yephondo, uLesufi ufumene ithuba lokuphakamisa indebe kuqala kwaze kwalandela zonke iinkokeli ebezikhona.
Umqeqeshi waBafana Bafana, uHugo Broos, uncome umsebenzi owenziwe nguRaymond Mdaka neqela lakhe emva kokuthubeleza ebunzimeni. "Majita, ukuya phezulu kulula - kodwa into enzima kukuhla phaya. Kukhona kuqala ubomi kuni ngoku," utshilo uBroos enika abadlali amazwi obulumko.
"Thathani indlela elungileyo ebomini benu. Thina siza kubonana enkampini yaBafana Bafana okanye nidlalela amaqela amakhulu okanye awaphesheya. Yonke into ixhomekeke kuni. Nifumene ithuba lokonwabela ukudlala ibhola ekhatywayo. Kodwa ndifuna ukuthi kuni sebenzani ngokuzimisela niphile ubomi obuhle," utshilo uHugo Broos.
Njengokuba kungekacaci ukuba iR3,6-million abayiphumeleleyo iza kufika nini, uHONOR uphe umdlali ngamnye ifowuni entsha ekuthiwa yiHONOR 400 Lite. Zizonke izipho ezinikwe Amajita zixabise imali ephay kumakhulu amabini anamashumi amahlanu amawaka erandi (R250,000).
Lo nto yenziwe nguHONOR ongomnye wabaxhasi bamaqela esizwe ebhola ekhatywayo phantsi kweSafa. UMongameli weSafa, uDanny Jordaan, uthe baza kubhatalwa bonke abadlali yakube ifikile imali esuka kwiCAF.