UJose Riveiro uyivumile induku emva kokubethwa kwePirates kwiNedbank Cup kwimpelaveki edlulileyo
Image: Yanga Nothanga/Maya Images
Ithemba likaJose Riveiro lokubuyela ekhaya ephumelele enye indebe liphelele omoyeni. Oku kwenzeke emva kokuba i'Orlando Pirates ibethwe yiKaizer Chiefs ngamagowuli amabini kwelinye emdlalweni weNebank Cup obubanjelwe eMoses Mabhida Stadium, eThekwini, emalanga ngoMgqibelo odlulileyo.
IPirates ayikwazanga ukongeza kwigowuli elifakwe nguEvidence Makgopa kwisagaba sokuqala somdlalo. Amagowuli ancede iChiefs afakwe nguGaston Sirino noYusurf Maart kwatsho kwaphela indla yeminyaka elishumi.
Njengoko uRiveiro sele exelile ukuba uza kuhamba ekupheleni kwesizini eqhubekayo, ebenethemba lokuphumelela iNedbank Cup amatyeli amathathu elandelelana njengokuba enzile kwiMTN8.
Akubanga njalo izolo nakubeni iPirates iye KwaZulu-Natal ikhuthazekile emva kokubetha iChiefs ngamagowuli amabini kwelinye emdlalweni weBetway Premiership kutsha nje. Emva komdlalo, umqeqeshi weBucs uvumile ukuba iqela lakhe loyisakele wongeza ngelithi umdlalo weNedbank Cup ubungenawo umtsalane.
"Ibingumdlalo ombi ukusukela ekuqaleni ukuya ekugqibeleni," utshilo uRiveiro emva komdlalo. Umdlalo ububambene futhi khange kubekho amathuba amaninzi avelayo. Into eyenze umahluko kukuba iChiefs iwasebenzisile awayo, kanti yona iPirates ayikwazanga.
"Ayincumisi indlela esidlale ngayo namhlanje. Bafumene ipenela kwangoko emdlalweni - kodwa sakhawuleza salifumana igowuli lokulinganisa," utshilo uRiveiro oza kuhamba eneendebe ezintlanu phantsi kwegama lakhe kwiPirates.
"Ebekhona amathuba okufaka elinye igowuli kwisigaba sesibini. Umdlalo uye wambi ngoba bekuxatyanwa futhi umane umiswa. Akukho nto esingayithetha kakhulu ngebhola ngoba ibingumdlalo ombi.
"Besizimisele ukufika kwisigaba sokugqibela somdlalo singaphezulu kweChiefs ngamagowuli ngoba besingafuni ukuba umdlalo uye kwixesha elongezelelweyo. IChiefs yenze umsebenzi ongcono kunathi," utshilo umqeqeshi wePirates esazama ukusukela iSundowns nasemidlalweni yeBetway Premiership.
Related Topics: