Thabo September Uthabo September ngumqeqeshi weChippa United yaseMpuma Koloni.
Image: BackpagePix
Iliso lakhe uThabo September sele elibeke kwisizini elandelayo. USeptember ukuveze oku ngethuba ethetha neentatheli emva komdlalo ogqithileyo. IChippa United ibuyele ekhaya isophisa emva kokungonjwa yiMamelodi Sundowns ngamagowuli amathathu eqandeni emdlalweni weBetway Premiership obubanjelwe eLoftus Stadium ngoLwesithathu wale veki.
Njengokuba isizini isongwa kule nyanga kaCanzibe, umqeqeshi uthi uzama ukunika abadlali amathuba okudlala angabadlalis kwsizini ezayo. Emidlalweni emibini eshiyekileyo, iChippa United iza kusebenzela ukubethelela indawo yayo kwiTop-8.
Okuhle kukuba ayisenalo ixhala lokulwela ukuphepha izembe njengamanye amaninzi amaqela. USeptember ugqamise ukubaluleka kokwakha iqela eliza kudlala kwisizini ezayo kwintetho yakhe kutsha nje. "Siqala amalungiselelo wesizini ezayo ngokudlalisa abadlali abathile emidlalweni yethu eshiyekileyo," utshilo uSeptember.
Emidlalweni elandelayo, iChippa iza kudibana neSundowns kwakhona phambi kokuvala isizini neMarumo Gallants. "Kubalulekile ukudlala kakuhle njengokuba sivala isizini. Singangena kwiTop-8 ukuba singafumana amanqaku amane emidlalweni emibini eshiyekileyo. Kodwa kubalulekile ukulihlaziya iqela njengokuba sijonge isizini elandelayo.
"Sineqela esinalo ngoku - kodwa ndicinga ukuba bakhona abadlali abatsha abaza kufuneka," utshilo uSeptember owangena ezihlangwini zikaKwanele Kopo owahamba ekupheleni konyaka ka2024. Iqela lakhe liza kudibana neSundowns emdlalweni oza kube useMonti ngoLwesithathu olandelayo.
Related Topics: