UThulani Mbenge uzingela indoda ezithembileyo enokulwa naye!
Uncumile uThulani Mbenge emva kokubetha imbethimanqindi yaseNamibia kutshanje ePitoli.
Image: Thulani Mbenge/Facebook
Imbethimanqindi yaseMpuma Koloni, uThulani 'Tulz' Mbenge, ifuna shushu omnye umlo obhetele emva kokuphumelela ngempelaveki egqithileyo. UMbenge, ophuma eMdantsane ngokuzalwa, ubethe uEmmanuel Mungandjela waseNamibia walala phantsi engondlalelwanga kumjikelo wesibini kumlo we-International welterweight obubanjelwe eSunbet Arena, ePitoli, ngomhla wokuqala kuCanzibe.
Indodana, yasebumelwaneni ezigxame kuMbenge, iye yanikezela emva kokuba ingakwazanga ukunyamezela amanqindi ayingozi. Ushiyeke esanxanelwe umlo uMbenge (33) ngoba uMungandjela uyeke kungekangenwa nakuvuthondaba womlo ebikulindeleke uhambe umgama omde.
Ethetha kwiSA Boxing Talk emva komlo, uTulz, oyintshatsheli ye-IBO welterweight, uyivuyele impumelelo ayizuzileyo ngelithi unike uMungandjela imfazwe ebethe uyayifuna. "Lo mfo ebethe ufuna imfazwe. Ndimnikile into ebeyifuna, imfazwe! Kumnandi ukulwela ekhaya. Bekunyanzelekile ndinike abalandeli bamanqindi umlo osemgangathweni ophezulu," utshilo uMbenge ehleka.
Ibingumlo wokuqala kaTulz lo kulo nyaka ka2025 ukusukela oko wabetha uMichael McKinson om lweni obubanjelwe eCopper Box Arena, eNgilane, ekuthambekeni konyaka ophelileyo. Uthi umlo uwithathe ngendlela ebezilungiselele ngayo. "Ndimxhole ngamanqindi abuhlungu ngoba bendisazi ukuba akuzuphinda asondele kum.
"Andifuni ukuxoka, lo mfo ebewufuna umlo. Ndmwise kwangoko ngoba bendifuna umlo ecocekileyo. Ndimlobile emva koko ndamdibanisa nenqindi elinamandla woyisakala. Kuhle ngoba ndiphumelele," utshilo uTulz osonge umlo engekabili.
Impumelelo ayifumeneyo kwiveki ephelileyo uMbenge imvulela indlela eyaphambili ukuze adibane neembethimanqindi ezikwinqanaba eliphezulu. Njengendoda enethuba elide emdlalweni wamanqindi, uthi iimbethimanqindi ebekufanele ukuba udibana nazo ziyambaleka kodwa uza kuzigqogqa nganye nganye.
"Ndizimisele ukulwa phesheya nendoda ezivayo. Akhona amadoda esikhe sawankqonkqozela - kodwa athi akanawo umdla kuba ejonge indawo endikuyo. Ndiza kuwakhwaza kude kubekhona evelayo," utshilo uMbenge.