UJose Riveiro ngumqeqeshi we'Orlando Pirates ogqibelisayo ekupheleni kwesizini eqhubekayo.
Image: Independent Media
UJose Riveiro uthi iqela lakhe liza kudlalela ukuphumelela ngomso. Oku ukuthethe kwiintatheli phambi komdlalo omkhulu ophakathi kweKaizer Chiefs nePirates obekelwe intsimbi yesithathu emalanga. Emidlalweni yeBetway Premiership emine egqithileyo, iPirates zange yabethwa yiChiefs phantsi kukaRiveiro.
Ngaphandle kwamathandabuzo, ngomso uza kuqula ade aligangathe ukuze iPirates ikwazi ukuphumelela ngokufanayo nasemidlalweni emine egqithileyo eyiphumelele kakuhle. "Lo ngumdlalo wam wokugqibela weBetway Premiership phakathi kwala maqela mabini eFNB Stadium. Umdlalo uza kube usendaweni ekhethekileyo kum nakubadlali," utshilo umqeqeshi wePirates.
Idabi laseSoweto lifika kakubi iPirates intywizisa emva kokuba iphulukene nemidlalo emibini ilandelelana. Kwiveki ephelileyo ibethwe yiPyramids kwiCAF Champions League, kule ibethwe yiSekhukhune United emdlalweni weBetway Premiership.
Ukubethwa kweBucs phakathi evekini ziindaba ezimbi ngoba lo nto icuthe amathuba okufumana iMamelodi Sundowns evule umsantsa emva kokubetha iRichards Bay ngamagowuli amathathu kule veki. Nangona uRiveiro ekwazile ukubetha iChiefs emidlalweni egqithileyo, uthe imbali ayithethi nto tu.
"Kunyanzelekile iPirates iphumelele ngomso ngoba iSekhukhune United ifuthela emagxeni wayo. "Okwenzeke emidlalweni egqithileyo akuthethi kulo mdlalo esijongene nawo," utshilo uRiveiro ethetha neentatheli izolo eGoli
"Siza kube sidlalela ukuphumelela ukuze konwabe abalandeli behu. Nayo iChiefs iza kube idlalela ukuphumelela. Yiyo lo nto ubaluleke kakhulu umdlalo. Singakujonga okwenzekileyo emidlalweni egqithileyo kwiminyaka ezayo.
"Eyona nto ebalulekileyo kuthi kukufumana amanqaku amathathu emva kokungaphumeleli emidlalweni egqithileyo," utshilo umqeqeshi. La maqela mabini aza kulwela indebe yeNedbank emdlalweni oza kube ukwiveki ezayo eMoses Mabhida Stadium.
Related Topics: