UPitso Mosmane akakuchasanga ukuqeqesha i'Orlando Pirates xa linokuvela ithuba.
Image: Facebook
Njengokuba isizini k2024/25 isongwa, ayanda amarhe ngomqeqeshi oza kuqeqesha i'Orlando Pirates kwisizini ezayo. Ekuqaleni kwale nyanga kaTshazimpuzi, iPirates yazise abalandeli bayo ukuba uJose Riveiro uza kuhamba xa kuphela le sizini nakubeni ibifuna ahlale eminye iminyaka.
Oku kwenzeka emva kokuba uRiveiro encede iPirates ngokuyinika iindebe ezintlanu eminyakeni emibini enesiqingatha. Lisekhona ithuba lokongeza ngoba iPirates ilwela ukuphumelela indebe yeNedbank neyeCAF Champions League. Emva kokwenza imbali kwakhe uRiveiro, kunyanzelekile abaphathi bePirates bakhangele umqeqeshi oza kugcina umgangatho uphezulu.
Phakathi kwamagama ajikelezayo wabaqeqeshi kubalwa uPitso Mosimane noRulani Mokwena - abangabaqeqeshi abaphambili ebholeni yezwekazi le'Afrika ngenxa yemisebenzi abayenzileyo eminyakeni egqithileyo.
UMosimane yindoda ehlonitshiweyo ebholeni ngoba phakathi kwezinto azenzileyo ebomini bahe kukuvusa iMamelodi Sundowns awayishiya inenqwaba yeendebe eziquka iCAF Champions League. Emva koko wayokwenza umsebenzi ofanayo kwiAl Ahly phambi kokuya kuqeqesha kwiSaudi Pro League, eSaudi Arabia.
Akukho qela aliqeqeshayo ngoku uPitso. Mhlawumbi yiyo lo nto igama lakhe liphakathi kwabantu abaongwe kwiPirates. "Ndivile kuthethwa ngalo nto - kodwa akukho mntu othethileyo nam. Sakubona ngoko," utshilo uPitso encokweni ebikuTikTok.
Nakubeni ephumelele iindebe ezininzi ebomini bakhe kodwa ngeke aliphose ithuba lokuqeqesha iqela elikhulu njengePirates. Ebuzwa ukuba unawo na umdla wokubuyela kwiPSL emva kokuqeqesha eSaudi Arabia, Egypt, Iran nase-United Arab Emirates, uthe akakuchasanga ukuba kukho umsebenzi ocacileyo ovelayo.
"Okwangoku ndisekhaya - kodwa ndixakekiswe zizinto zesikolo," utshilo uPitso onesikolo sophuhliso sabantwana abancinane abadlala ibhola ekhatywayo. Ukubuyela kukaPitso kwiPSL ingayinto enika umdla kakhulu ebholeni - kodwa akukacaci kakuhle ukuba ngubani oza kunikwa umsebenzi onzima yiPirates.
Related Topics: