Amawaka amabini eembaleki kulindeleke zikhuphisane kwiTymeBanks Langa Ru4Freedom eza kube ingomhla wamashumi amabini anethoba kule nyanga eKapa.
Image: TymeBank Athletics Club
Iimbaleki eziphuma kwiindawo ngeendawo eNtshona Koloni kulindeleke ukuba ziqhumiselane ngothuli kube nzima ngomhla wamashumi amabini anethoba kule nyanga kaTshazimpuzi xa zidibana kugqatso oluza kube lubanjelwe kwaLanga, eKapa.
Abaququzeleli beTymeBank Langa Run4Freedom bathi bakulungele ukwamkela iimbaleki ezisondele kumawaka amabini kwisiqendu sesine somdyarho weembaleki okhula ngendlela encomekayo. Kuthiwa iTymeBank Langa Run4Freedom, engumgama oziikhilomitha ezilishumi (10Km), ivuleleke kuwo onke amaqela neembaleki ezinelayisenisi.
Phakathi kweembaleki eziza kuthatha inxaxheba kukho uWilliam Kaptein ophuma kwiTymeBank Langa Athletics Club. Ingxelo ithi uKaptein ebephakathi kweembaleki eziqhube kakuhle kwiTwo Oceans Half Marathon ebisekuqaleni kwale nyanga kaTshazimpuzi, eKapa.
Yahlulwe kubini imidyarho yeembaleki. Abantu ababaleka nje baza kubaleka kwi6km. Kanti ooxholovane baza kuswantsulisana kwi10km. Konke oku kwenziwa egameni lenkululeko yaseMzantsi Afrika edibanise amashumi amathathu eminyaka.
Abaququzeleli bathi le yindlela ababhiyozela ngalo umanyano lwababantu baseMzantsi Afrika nenkqubela abayenzileyo eminyaka engamashumi amathathu egqithileyo. Wonke umntu wamkelekile kwimini eza kusetyenziswa ziimbaleki ezininzi njengeqonga lokuzivavanya Amandla, ngakumbi ezibaleka imigama emide.
"Siziva siwongekile xa sifumana ithuba lokuxhasa umdyarho weembaleki obaluleke kangaka eKapa," utshilo uMnu. Karl Westvig, oyingqonyela kwaTymeBank. "Ngokwenjenje, sinethemba lokuba ulutsha luza kukhuthazeka lutsho lunyathele ekhondweni lamaqhawe afana neWilliam Kaptein oziqaqambise kwiTwo Oceans Half Marathon.
"Sizamkela zonke iimbaleki ngokwahlukana kwazo. Eli lithuba lokuba yinxalenye yemini yokubhiyozelwa kosuku leNkululeko ngendlela ebalulekileyo," uvale ngaloo mazwi uMnu. Westvig. Iimbaleki ziza kuqala ukubaleka eLanga Sports Stadium zibhijele kwiindawo eziquka iBitterhout Anenue neWashington Street eziyinxalenye yembali etyebileyo kwilokishi yakwaLanga.
Imbaleki ezibalekela ulonwabo azibhatali. Ezisakhasayo ziza kubhatala iR50, ezindala ziza kubhatala iR70 - kanti ooxholovane abanamaqela baza kubhatala iR120 ukuya kwiR180 ngokushiyana kwabo.
Kubhaliswa kwaLanga Sports Stadium ngomhla we25 ukuya kowe26 kule nyanga. Abanye bangabhalisa apha: https://bit.ly/tymelangarace ukusuka ngentsimbi yesihlanu ukuya kweyesixhenxe ekuseni ngomhla we27 kuTshazimpuzi.
Related Topics: