UNoku Matlou ubeke phantsi kwiqela lesizwe emva kokulidlalela ikhulu elinamashumi asixhenxe anesine emidlalo.
Image: Sasol/X
Omnye wabadlali abaphambi ebholeni ekhatywayo yamantombazana, uNoku Matlou, ubeke phantsi ngokusesikweni ebholeni ekhatywayo emva komdlalo obungempelaveki egqithileyo. Ukwenze oku emva kokuba aBanyana Banyana bevuthulule iMalawi ngamagowuli amathathu eqandeni iMalawi emdlalweni wobuhlobo obuseSoweto.
Okwenziwe emdlalweni wayizolo ibiyindlela oogxa bakhe ababulela ngayo womnke umsebenzi awenzele uMzantsi Afrika. ABanyana Banyana bazicacise kwangoko emdlalweni okuba banamandla ngaphezulu kweMalawi. UNonhlanhla Mthandi ubhakuzelise umnatha emzuzwini weshumi elinesithathu kwisigaba sokuqala.
Kudlule imizuzu esibhozo uLinda Motlhalo wafaka elinye igowuli ngepenela. Emva kokuya kwixesha lokuphumla umsebenzi sowucalanye, uMzantsi Afrika ufumene elinye igowuli elifakwe nguMthandi oye wafumana iwonga lomdlali oqaqambileyo emdlalweni wobuhlobo kwiphondo laseGauteng.
UMatlou ubeka phantsi encede aBanyana Banyana enemidlalo elikhulu elinamashumi asixhenxe anesine (174). Ngonyaka ka2008, uMatlou wafumana iwonga lomdlali wonyaka (CAF Footballer of the Year) emva kokuba wayencede uMzantsi Afrika kwiCosafa Cup. Emva komdlalo wenze amazwi wombulelo koogxa bakhe nakwiqela lesizwe ngokubanzi.
"Ndonwabe kakhulu futhi ndifuna ukulinqwenelela okuhle iqela lesizwe njengokuba lilungiselela ukuya kwiWafcon nasemidlalweni ehlakulela iFifa Women's World Cup elandelayo," utshilo uMatlou oyeka ukudlala enamagowuli angaphezulu kwamashumi amathandathu kwiqela lesizwe.
Ngomso aBanyana Banyana baza kuthathana kwakhona neMalawi emdlalweni wobuhlobo. Konke oku yinxalenye yamalungiselelo kaDesiree Ellis ofuna abadlali bakhe bakulungele ukudlala xa kufika iWafcon. Kungekudala, uMzantsi Afrika uza kulungiselela ukudlalela ukuya kwitumente yehlabathi ityeli lesithathu emva kokwenza umsebenzi ongcono kwedlulileyo ebise'Australia naseNew Zealand.
Related Topics: