Umlungisi Mbunjana wophule iintliziyo zabalandeli beKaizer Chiefs emdlalweni obuseNew Peter Mokaba Stadium. BackpagePix
Image: BackpagePix
Igowuli elifakwe yiTS Galaxy emizuzwini yokugqibela livimbe iKaizer Chiefs impumelelo namhlanje ebusuku. Oku kwenzeke emva kokuba iChiefs ibambene ngegowuli elinye macala neTS Galaxy emdlalweni obushushu ePeter Mokaba Stadium.
Belikhona ithemba lokuphumelela kweChiefs emva kokufumana igowuli kwangoko kwisigaba sokuqala. Kodwa impazamo eyenzeke kwisigaba sesibini emhlabeni kanozinti inike iTS Galaxy ithuba elihle lokufumana igowuli lokulinganisa ebekukudala ilizingela.
Umdlalo kwisigaba sokuqala ubusemgangathweni ophezulu. Omabini amaqela aye emdlalweni wanamhlanje enxanelwe amanqaku apheleleyo emva kokungaqhubi kakuhle kwegqithileyo. UGaston Sirino, uGodly Lilepo noWandile Duba ngabona badlali abazamileyo ukuyisokolisa iTS Galaxy emhlabeni wayo.
Ekuqaleni ikwazile ukuchitha iibhola ezimbi ezidlalwe yiChiefs. Kodwa umdlali weTS Galaxy wenze impazamo ibhola yadibana noSirino. Uzame ukweqisela unozinti oye wayichitha ngesandla. Ngethamsanqa kuthe gqi uDuba wayifaka emnatheni.
Amakhosi aye kwixesha lokuphumla enkqenkqeza phambili ngegowuli elinye eqandeni ebaleni ebeligcwele ePolokwane. Nakubeni iChiefs ithanda ukubaphoxa abalandeli bayo - kodwa bebephume ngobuninzi.
Nangona iTS Galaxy ingakwazanga ukudala amathuba acacileyo ngaphandle kweekona ezikhatye nguKeagan Dolly, kodwa ebekhona amaxesha ekuye kwanyanzeleka ukuba uBruce Bvuma asebenze. UVictor Letsoalo ebevalwe mba nguMiguel noMsimango abenza iimpazamo ngamanye amaxesha.
Ibuye ngamandla iTS Galaxy kwisigaba sesibini somdlalo. Izibizele ingxaki iChiefs ngokudlalela emva, yenza neempazamo ezimbi. UMiguel uye wonzakala kwangena uDove uwenze impazamo enike uMbunjane ithuba lokufaka igowuli lokulinganisa.
UMmodi noLilepo abadlalanga ngendlela ebilindelekile kwisigaba sesibini. Inqaku elinye elinyenwe yiChiefs emdlalweni wanamhlanje liyibuyisela kwiTop-8 kodwa indlela edlala ngayo icacisa mhlophe ukuba ingasokola ukuyifumana nakule isizini.
Related Topics: