uAzinga Fuzile yimbethimanqindi yaseDuncan Village, eMonti, kwiphondo leMpuma Koloni.
Image: Facebook
Imbethimanqindi yaseMpuma Koloni, uAzinga Fuzile, ibila isoma enkampini - apho ilungiselela khona ukudibana noSultan Zaurbek emlweni ekulindeleke utake iintlantsi eKazakhstan ngoMgqibelo. Eli lilinge likaFuzile lokuqala kulo nyaka umtsha lokuzama ukuphinda abe yintshatsheli yehlabathi.
Le mbethimanqindi yaseDuncan Village izinike ithuba lokuzilolonga noompetha Egoli phantsi kweliso elibakhali likaZolani Tete owaziwayo kwihlabathi lonke kwicandelo lamanqindi. UFuzile, 28, untingele eKazakhstan ekhuthazekile emva kokuphumelela imilo emithathu ayilwe apha ephondweni kule minyaka embalwa egqithileyo.
Emlweni wale veki, uFuzile uya kuwo ekhangela indlela yokubuyisa isidima sakhe emva kokuba wabethwa nguKenichi Ogawa emlweni owawubanjelwe eNew York, eMelika. Kudliwanondlebe alenze namajelo eendaba phambi kokuhamba kwakhe, uFuzile akafunanga ukuthetha kakhulu ngoZaurbek kuba engafuni ukubeka uxinizelelo kuye phambi komlo ose'Astana Arena ngempelaveki.
"Into endizithembise ngayo kukuba ndiza kuba yintshatsheli kulo nyaka okanye kunyaka. Ndenza oku ngoba ndifuna ukwenza into ekholisa mna. Andifuni ukuphazamiseka ngoba isigqibo sokudlala amanqindi sathathwa ndim ndodwa," utshilo uFuzile encokola neBoxing Talk SA.
Uthe uza kumwisa uZaurbek ukuba uze kuye ngokungakhathali - kodwa isicwangciso sakhe kukuyigqiba yonke imijikelo elishumi yomlo. "Ungaphela kwangoko umlo ukuba kuvela ithuba - kodwa ndilungiselele imijikelo epheleleyo. "Yimbethimanqindi ekwaziyo ukulwa kakhulu futhi eya phambili xa iseqongeni. Kodwa ndiqinisekile ukuba ndiza kumoyisa yena," utshilo uFuzile.
Ulindwe nguZaurbek osele etshilo ukuba umlo wangempelaveki ngowona ubaluleke kakhulu ebomini bakhe. Ukhuthazekile uZaurbek emva kokubetha uDamain Wrzesinski ekupheleni kuka2024. "Ndivuyela ukulwela eKazakhstan kwakhona emva kweminyaka emine. Lo ngowona mlo omkhulu ebomini bam njengembethimanqindi," utshilo uZaurbek kwiBoxingScene.